Nombernan di esnan cu OM lo apela contra den caso Ibis ta conoci

ORANJESTAD – Fuera di ex minister Paul Croes, tin cuater nomber mas di persona di cual Ministerio Publico lo apela e sentencia den caso di Ibis. Ta trata di personan cu a haya absolucion total di e caso. Pero OM no por a bisa ken e personanan ta pero a bisa solamente cu ta trata di esnan cu a haya absolucion total.  Pero informacion cu NoticiaCla tin confirma ta bisa cu ta trata di e sospechosonan R. di Vecchia, N. Nunez, T.Chan y R. Martinus.  No ta conoci si nan lo keda cu nan mesun abogado, of si nan lo cambia di representacion. Den caso di ex minister Croes, tin indicacion cu lo kier cambia di abogado, pero no a confirma esaki ainda. 

ABSOLUCION

Dia di e sentencia den e caso Ibis dia 22 di februari ultimo, e huez a opta pa cuminsa cu esnan cu a haya absolucion total di e caso. E cinconan cu a haya absolucion ta  entre otro T. Chan, R. Martinus, N. Nuñez, R. Di Vecchia y M. Arango. Mientras cu OM a bisa cu a dicidi cu ta apela contra 4, no a bisa cua di nan. Pues uno di nan no ta wordo apela. E otronan (total di 23 sospechoso), 9 a haya castigo di multa di 5 mil florin, dos a haya castigo di prison y 3 (incluyendo casa di e ex mandatario, a haya castigo di trabou comunitario.