China y Indonesia tambe ta ‘ground’ nan avionan B737 Max 8

ADDIS ABBABA – Tanto Indonesia como China a uni cu Ethiopia pa tene e avionan tipo Boeing 737 Max 8 na tera como precaucion. Esaki despues cu ayera (diadomingo) un di esnan di Ethiopian Airlines a cay matando tur 157 persona abordo. Merca su instancia federal di aviacion (FAA) ta compronde e accion aki pero ta prefera warda e investigacion su resultado, pa despues actua mas concreto. Na Hulanda e unico compania cu ta usa e avionan aki ta TUI, cu tambe a opta pa warda e investigacion te ora cu tuma mas paso. E accidente cu e avion aki ta e di dos cu a tuma lugar den 5 luna di tempo, aunke ta un otro aeroliña tabata envolvi e momento ey. A haya e caha preto di e avion unda cu por scucha e voz di e pilotonan den nan ultimo minuto di buelo pa determina kico a pasa den cockpit, y tambe a recupera e caha preto di e datonan di buelo. Ambos ta importante pa determina kico exactamente a pasa cu e avion a cay. Esaki pasobra e tabata un avion nobo di apenas 4 luna tempo di operacion.