OM: Fuera di ex minister, lo apela contra 4 cu a haya absolucion completo den caso Ibis

ORANJESTAD – Ministerio Publico (OM) ta bay apela contra e sentencianan di esnan den caso Ibis, cu a haya absolucion total. Esaki e vocero di OM, Ann Angela a bisa. Esaki riba insistencia di NoticiaCla, pasobra den e informe anterior, a informa solamente cu ta bay apela e sentencia di ex minister Paul Croes, y 4 otro sospechoso. Pero no a bisa ken. Riba insistencia, OM a confirma cu ta trata di 4 di esnan cu a haya absolucion total den e caso. Mientras cu e ta trece un poco mas claridad, ainda falta, pasobra tin 5 persona cu a haya absolucion, pero ta apela contra 4. 

ABSOLUCION

Dia di e sentencia den e caso Ibis dia 22 di februari ultimo, e huez a opta pa cuminsa cu esnan cu a haya absolucion total di e caso. E cinconan cu a haya absolucion ta  entre otro T. Chan, R. Martinus, N. Nuñez, R. Di Vecchia y M. Arango. Mientras cu OM a bisa cu a dicidi cu ta apela contra 4, no a bisa cua di nan. Pues uno di nan no ta wordo apela. E otronan (total di 23 sospechoso), 9 a haya castigo di multa di 5 mil florin, dos a haya castigo di prison y 3 (incluyendo casa di e ex mandatario, a haya castigo di trabou comunitario.