Ex minister Croes kier cita politiconan como testigo den caso Ibis

ORANJESTAD – Ex minister Paul Croes kier cita un lista di politico na Aruba pa testigua den su caso di apelacion proximamente.  Asina el a declara durante un entrevista na e portal di noticia 24ora.com dialuna atardi. Manera ta conoci Croes a keda sentencia luna pasa na 4 aña di castigo di prison y 10 aña no por eherce ningun funcion politico y no por participa na un eleccion politico. Croes durante e entrevista a bisa cu mientras cu e no kier divulga su strategia completo, e por bisa si cu e ta bay scucha un cantidad di politico como testigo. Mientrastanto Ministerio Publico tambe a bin cu un declaracion riba nan intencion di nan intencion di apela unda cu a confirma cu nan ta apela e sentencia contra Croes, y 4 di esnan cu a haya absolucion (vrijspraak) completo. 

CASO IBIS

Durante un entrevista cu e portal a haci cu e ex minister, para dilanti Corte di husticia dialuna, el a declara cu e ta keda para riba su inocencia despues di a keda sentencia. Ademas a mustra cu e strategia di usa un cantidad di politico como testigo tanto ex como actual, ta pa nan splica con nan ta haya placa pa campaña y asina demonstra cu no ta e so a actua asina sino cu e ta cultura politico di Aruba unda cu politiconan ta ricibi donacionan pa financia nan campaña politico. Ademas a sigura cu e ta bay usa e mesun abogadonan pa su caso di apelacion, aunke un grupo di abogado (6) a acerke caba pa yude cu su caso. 

REACCION POLITICO

E anuncio mas tempran di dia di e portal cu lo tin politiconan cu tin cu presenta dilanti mesa berde, a crea basta reaccion. Aunke no tabata sigur ainda den ki relacion. Un di esnan cu a reacciona riba su pagina di Facebook, tabata Prome Minister Evelyn Wever, cu a bisa cu “Ohala cu ta berdad, pa mi mustra con nos di MEP ta financia nos campaña full diferente cu AVP ta financia di nan. Koffiemorgen. Rifa. BBQ. Bingo. Nos si sa kiko ta regla y etica. Pero lamentablemente esaki ta otro”, e mandatario a bisa. E mandatario, for di New York, a confirma su declaracion na NoticiaCla dialuna atardi pero a bisa tambe cu e no a tende e declaracion di Croes, pero si a tuma nota di e articulo. Ademas e mandatario a bisa e portal aki cu e statement di (Mike) Eman cu loke a pasa cu Paul (Croes) por pasa cu “nos” tur, 'no ta apply pa mi', segun e mandatario. E mandatario ta eynan (NY) pa duna varios presentacion importante.