Director DVG a perde otro caso contra minister Oduber

ORANJESTAD – E director di Departamento di Salud Jerry Staring a perde su caso contra minister Dangui Oduber dialuna mainta. Esaki  den sentido cu a declara peticion di e director no admissible pa protesta e hecho cu e mester a traha otro trabou cu loke ta su trabou como director, pa periodo di 12 siman. Argumento principal di corte ta cu e periodo en cuestion a pasa caba. Como tal no tin sentido pa e caso aki, ni si Staring tabatin razon. Como tal, huez a rechasa e peticion di Staring den e caso aki. 

E CASO

Tabata aña pasa juli cu Minister di Salud Dangui Oduber a ordena e director pa un periodo di 12 siman, eherce otro funcion cu no ta di director, pendiente un investigacion tumando lugar den e departamento. Esaki despues cu corte a duna Staring razon cu e no por a wordo stroba entrada na e departamento. Huez na e occasion ey a dicta cu Staring por drenta e edificio pa traha. Loke cu huez no a bisa e tempo ey, ta cu e mester eherce e funcion di director. Aki e diferencia tabata pa cual Staring a protesta despues. Huez a mustra cu Staring su motivacion no tabata suficiente pa crea un motibo pa e por sali bentahoso di e caso. Ademas e mandatario su defensa a splica cu ora cu Minister a institui un management team temporal, Staring no a protesta contra esaki.  Mirando tur e desaroyo aki, Corte a opta e ora pa rechasa e peticion di Staring y a dicta na fabor di e Minister. Ambos partido tin 30 dia pa apela e caso aki den Corte di apelacion di caso di ambtenaar. Lesa e sentencia AKI.