Pelicula ‘He matado a mi marido ‘di productor local a estrena na Aruba

ORANJESTAD – E ta un di e dos peliculanan cu mas el a disfruta trahando. Asina e actriz Venezolana Maria Conchita Alonso a bisa NoticiaCla durante un conferencia di prensa diabierna ultimo, refiriendo na e pelicula ‘He matado a mi marido’. E pelicula a estrena diabierna anochi den Renaissance Cinema. Hunto cu e productor local (di Aruba) Jo Henriquez y su pareha Daniela Ruiz, nan a toca e tema di e pelicula. Hunto cu e pelicula ‘Caught’ (1996), e ta considera esun aki como esun mas pret. “Si nan bisami cu den e proceso, e cinta a kibra y nos tin cu filme di nobo, mi no tin problema pa ripiti esaki” Conchita Alonso a bisa, splicando asina con hopi placer e tabatin pa traha e pelicula aki. Pa Aruba, ta un honor pa tin un Arubiano produciendo un pelicula di un caliber halto asina. 

PROCESO

Ora cu e Arubiano Jo Henriquez a acerca Conchita Alonso, e ultimo aki a recomenda un lista di actor y atriz pa busca pa completa e lista di artista. Y segun Henriquez, casi tur cu Conchita a recomenda, a wordo busca tambe. E pelicula ta wordo considera como un ‘tragicomedia’, unda cu Conchita pa acidente ta mata su casa, y ta sconde e curpa pa por continua cu e plan pa tene un fiesta na honor di su casa (morto). E ta un intensidad di comienso te fin, cu un elenco di artista renombra, manera Guy Ecker (esun cu ta muri), ex miss Universo Alicia Machado cu ta hunga e papel di ruman di Conchita, esta Telma,  Assumpta Serna cu ta hunga papel di e sirvienta y Eduardo Yanez, e jardinero cu ta bira un complice den e complot.  Segun Henriquez, a tarda apenas 18 dia pa traha e pelicula y tabata cu un presupuesto abou. Asina mes a logra haci hopi cu e pelicula y ta estrenando esaki den miles di sala rond di Merca, Caribe, Europa y otro paisnan internacional. 

E EVENTO

Den cuadro di e lansamento di e pelicula aki diabierna, esnan responsabel, a invita un grupo di invitado pa e estreno. Den e sala VIP di Renaissance, a estrena e pelicula aki, despues di cual tabatin un session di Q&A, esta di pregunta y contesta cu e artista Venezolano y tambe e productor local, unda cu varios hende a haci pregunta. Durante e pelicula, ora cu a presenta e credencialnan, ora cu nomber di Jo Henriquez a aparece riba pantaya, esaki a crea un aplauso di sala. Na final di e pelicula, e sala a duna Henriquez un ‘standing ovation’, como orguyo local cu ta logra algo grandi riba tereno internacional. Jo su mayornan orguyoso, e conocida comerciante y cantante Landa Henriquez y su tata Raoul, tambe tabata presente den sala, aunke nan a duna tur atencion na nan yiu y a keda ‘den backround’. E pelicula lo continua riba pantaya grandi te ora cu tur hende haya oportunidad pa wak el. Wak e trailer AKI.