Maria Conchita kier intervencion militar na Venezuela

ORANJESTAD – “Tanto ami como mayoria di e Venezolano, un 80 pa 90% kier intervencion militar (na Venezuela)”. Asina e actriz Venezolana Maria Conchita Alonso (61) a bisa NoticiaCla diabierna riba su pensamento pa cu e situacion actual na Venezuela. El a bisa esaki durante un conferencia di prensa na Aruba pa promove su ultimo pelicula ‘He asesinado a mi marido”, cu a estrena diabierna den Renaissance Cinema riba nos isla. Conoci como un activista politico, e portal aki a haci’e e pregunta tambe. Presidente Maduro ya caba a pidi pa revoca su ciudadania Venezolano. 

RIPITICION 

E declaracion cu el a haci pa e portal aki no ta nada nobo. De hecho, Conchita Alonso a bisa esaki prome biaha na September di 2014, durante un entrevista na radio bisando cu “Merca mester interveni pasobra Cubanonan a invadi (Venezuela) caba sin lansa un bala, pasobra nan a dun’e (Venezuela) por nada”. E kier pa Merca drenta y usa municion pa saca tur comunista for di Venezuela. Conchita Alonso den pasado a compara Hugo Chavez Frias como un dictador manera Hitler. Ora cu Conchita Alonso a haci e prome declaracion pa intervencion militar, ta ora cu actual presidente Nicolas Maduro a pidi pa cuminsa e proceso pa revoca e ciudadania di e artista. Conchita Alonso ta conciente cu e no por bolbe Venezuela, pero ta bringando su causa for di exterior. Conchita Alonso a muda pa Merca na 1982 unda cu el a cuminsa su carera artistico den peliculanan grandi.