SAC ta entama caso sumario contra SMAC diahuebs caba

ORANJESTAD – Stichting Arubaanse Carnaval (SAC) lo entama un caso contra fundacion SMAC (Stichting Maneho pa Aruba su Carnaval) diahuebs mainta. Esaki a keda confirma pa abogado SAC, Darrin Crouch diahuebs mainta. “Nos ta bay entama caso pa declara e fundacion SMAC ‘nietig’” Crouch a bisa NoticiaCla.com. Cu esaki nan ta purba anula e fundacion su existencia. E base di e caso ta pasobra ta strobando e fundacion SAC di eherce su labornan manera cu ta stipula den su statuut. E desicion a cay diahuebs mainta, despues cu un dia prome gobierno pa medio di prome minister Mike Eman, a anuncia cu nan ta otorga fundacion SMAC e permiso pa organisa carnaval 2015. 

Segun minister Otmar Oduber di Cultura, e decision aki ta” teniendo na cuenta e interes y exito di nos fiesta cultural di mas grandi”. Di parti di e fundacion SAC (Stichting Arubaanse Carnaval), presidente Tecla Kelly a reacciona na NoticiaCla.com diaranson ainda cu ‘nos no a tende nada oficial ainda’, pero cu esaki ta haci nan caminda pa corte ‘mas facil’.

Despues cu e Grupo Uni a bisa NoticiaCla.com den fin di siman cu nan no ta participa mas y a manda un carta pa prome minister Mike Eman cu e mensahe ey, diaranson cos a cambia ora cu nan a wordo yama pa un reunion diaranson merdia 12:30pm. Tabata conoci for di dialuna cu cos no tabata sinta bon serca gobierno y cu lo mester a discuti cu polis y SAC, kico ta e siguiente paso. SAC a reuni (manera cu NoticiaCla.com a raporta tambe) cu mando di polis dialuna ultimo, pero partidonan no a yega mucho leu. Polis a bisa SAC cu nan tin e permisonan firma caba, pero no por duna nan ainda pasobra ‘gobierno no a aproba esaki ainda’. SAC a declara despues cu polis a bisa nan cu ‘tur permiso ta firma pa nan’ pero cu ‘gobierno tine wanta’.

Cu e decision nobo aki, tin indicacion cu e caso aki lo termina dilanti mesa berde, manera cu SAC a splica NoticiaCla.com anteriormente. No ta conoci kico a conduci Grupo Uni pa cambia di postura y ni tampoco kico a convence gobierno pa duna SMAC e permiso, despues cu nan a pidi gobierno pa duna SAC tur cos. E foto ta di e fundacion Grupo Uni, despues cu nan a bandona e reunion cu gobierno, diaranson merdia.