SADA ta protesta promocion di colega pa inspector di douane

ORANJESTAD – Sindicato di douaneronan esta SADA ta malcontento cu un nombracion di un colega cu a keda promovi como inspector di douane. E problema segun  presidente di e sindicato, Eduard Maduro, ta cu e persona no tin e educacion necesario pa por bin na remarke pa e funcion aki, esta ta carece di e diplomanan necesario. Ademas, loke ta molestia Maduro ta e hecho cu e peticion a bin di parti di director di e departamento, cu a haci esaki no obstante cu el a haya dos conseho negativo di Departamento di Recurso Humano DRH. DHR segun Maduro, ta considera e nombracion aki como un fayo y lo a priminti un coreccion di e fayo aki. 

POLITICO

Maduro ta mustra tambe cu e ta condena e hecho cu e peticion pa e promocion, a bin apenas algun luna prome cu e ultimo eleccion, pues ta considera esaki un zet politico. Ora cu a bay investiga, segun Maduro, a bin resulta cu DRH a confirma e informacion aki y cu minister y gobernador lo a firma e Landsbesluit (LB) dia 11 di juni 2018, pero mas pio ainda segun Maduro, cu esaki ta drenta na vigor cu forza retroactivo te 1 di januari 2016. DRH segun Maduro, a priminti cu esaki ta un fayo y cu lo coregi esaki. Ora cu nan a acerca e director, segun Maduro, e director a bisa cu ta un fayo di DRH y no di dje. Algo cu Maduro ta considera straño mirando cu DRH lo a duna dos conseho negativo caba y toch e director a insisti pa e promocion aki tuma lugar. Lo atende esaki awor cu prome minister Evelyn Wever y tambe minister Xiomara Ruiz Maduro cu ta e mandatario responsabel pa douane.