Crash avion di FedEx na St Maarten ta laga un homber morto y uno perdi

SIMPSON BAY—Un homber ta confirma morto y uno ta perdi ainda. Ta trata di tripulacion di e avion bimotor di Federal Express cu a intenta un aterisa di emergencia acuatico 2 miya for di costa di St Maarten diaranson anochi. E avion, un short 360, a lanta buelo 6:45pm for di aeropuerto internacional Princess Juliana cu destino Puerto Rico, pero a ‘crash’ segun e corant local Island Times. Guarda Costa y e St Maarten Sea Rescue mesora a cuminsa busca pa sobreviviente, y a wordo acompaña pa un cantidad di boto priva, y marina real hulandes, y un helicopter Frances. E buskeda mes no tabata hopi facil debi na e mal tempo, cu awacero pisa y lamper.

E informacion ta cu den careda di 9:30opm, partinan grandi di e avion a cuminsa yega tera entre Mullte Bay y La Samanna. Den careda di 10;20, Guarda Costa a haya e curpa sin bida di un homber hoben, probablemente e co-piloto di e avion, entre Mullet Bay y Cupecoy. E curpa a keda transporta pa e cuartel di Guarda Costa. E forma den cual a haya e curpa, ta indica cu e crash tabata uno violento. Tanto e co piloto como piloto tabata mericano di Puerto Rico.

Banda di 1’or di marduga, a para e buskeda debi na e situacion di tempo. Informacion di Island Times, ta bisa cu e avion tabata envolvi den un otro incident algun dia prome caba, ora cu e piloto durante aterisahe na St Maarten a haya problema y a baha for di e pista, y casi dal den e bunker di jet fuel. E avion tabata den reparacion pa e ultimo dos dianan pa reparacion. Fotos cortesia St Maarten Island Times.