Aparato cu Edward Cheung a diseña, a bay perdi den explosion di cohete 'Antares'
MARYLAND – E cohete (raket) 'Antares' cu mester a transporta toneladas di ekipo pa e laboratorio espacial diamars anochi, a rementa 20 seconde den pleno lansamento. Y cu e explosion aki, un obra fabrica y lidera pa e arubiano Edward Cheung, tambe a bay perdi. Cu esaki, e incidente aki ta yega ‘mas serca di cas’. No ta kita afo cu e explosion di e cohete, tabata induci pa e personal mes. E hecho ta cu un aparato cu nos arubiano a traha, awor a bay perdi. E aparato, diseña pa detecta fuga di cierto gas, tabata parti di e ekipahe pa e nave. Awor tin cu ekipa un otro cohete, cu e replica cu Cheung a traha. E la confirma na NoticiaCla.com cu enberdad tin dos, y cu nan ta prepara pa algo asina.
Cheung, despues di a biaha 3 ora pa e sitio di lansamento, tabata (hunto cu su famia), serca di loke a sosode. “E prome seconde di e lansamento a bay sin ningun incidente”Cheung a conta NoticiaCla.com. “Nos por a mira e motor di e prome fase start, y e cohete a keda lansa ariba, for di e toren di lansamento” Cheung ta sigui conta. Manera ta norma, un cantidad di huma ta sali for di e cohete. “Mi a spera di mira e cohete sali for di e huma ey. Ora cu esey no a sosode 4 seconde den e lansamento, mi a realisa cu algo tabata robes” Cheung a bisa.
Mientras cu otronan a keda sinta, Cheung a lanta para y pone su mannan riba su cabes, den estado di shock. 31 seconde despues di e explosion, e onda di e choque a alcansa e area unda cu Cheung y demas persona tabata. “Mi por a corda cu nos a tende un boom duru. E por tabata un echo di e explosion” Cheung a bisa. Mesora nan a haya instruccion pa bandona e sitio pa medio di busnan special ubica. Mes momento tabatin hopi vehiculo di emergencia cu sirena, moviendo cu velocidad halto pa e sitio.
Ta despues a bira conoci cu e explosion tabata induci pa un personal di seguridad ( Un RSO (Range Safety Officer) di e area. “No compronde mi malo. E ta entrena pa esey. Ora cu e la mira cu e cohete no kier a sigui subi, e la primi e boton di propio destruccion ( pa evita un otro problema mas grandi)” Cheung a bisa. E tabata un anochi traumatico, pero ningun hende a sali herida, cu ta e punto mas principal. “Nos a traha uno di spare, y lo ta preparando esaki pa un proximo lansamento” Cheung a finalisa bisando. Nota. Tur e potretnan ta di Edward Cheung, cu e mes a saca durante e lansamento y tambe di e aparato cu e la diseña.
Posibilidad cu Coronavirus a yega Colombia caba
BOGOTA – Autoridad sanitario di Colombia ta evaluando un caso di un pasahero di nacionalidad Chines cu a bin di un buelo di Turkia y cu lo por tin e simptoma di e virus nobo corona. E stranhero a keda traslada mesora pa un clinica den e parti occidente di Bogota unda cu a realisa e examenan necesario pa determina si e tin e virus of no.
Corona virus a cobra bida di 17 hende caba na China
HUBEI – E cantidad di morto na China a consecuencia di e virus corona a aumenta ten a 17. Asina autoridad di Hubei a anuncia. Te cu awor e cantidad di morto tabata poni na 9. Den Hubei tin e ciudad miyonario Wuhan unda cu e malesa a aparece luna pasa. Tin por lo menos 444 persona malo cu e virus. E la pega tambe na Bejing y Shanghai. Pafo di China, tin na Taiwan, Japon, Sur Korea, Thailandia y Merca. Tur ta hendenan cu tabata na Wuhan. Na parti norte di Mexico tambe tabatin hende cu a keda afecta.
Merca a confirma su prome caso di Wuhan Coronavirus
WASHINGTON – Merca a confirma su prome caso di e virus nobo cu a aparece luna pasa na Wuhan, China, esta e wuhan coronavirus. Asina e centro di control di malesa contagioso (CDC) a raporta diamars. E virus a mata 6 hende caba na Asia y a pone cu centenares di hende a bira malo. E Mericano malo ta isola den un centro na Washington, Merca, el a biaha di Wuhan pa Merca, pero a bisa cu e no a atende e mercado di bestia unda cu hopi di e pashentnan tabata infecta. Merca ta compilando un lista di pashen cu por a drenta den contacto cu e homber desde su regreso pa Merca. E Wuhan virus por wordo transmit di hende pa hende pero no mes facil manera sarampi of influenza. A informa cu lo cuminsa screen pasaheronan cu yega directamente di Wuhan pa e aeropuerto di Atlanta.
BBC: Scientificonan a descubri celnan humano cu por trata y cura cancer
WALES – Descubrimento di un parti nobo di nos ‘sistema di imunidad’ por trata y cura tur tipo di cancer. Asina cientificonan di e Universidad di Cardif na Inglatera a bisa, segun un raportahe di e portal di noticia britanico BBC. E ekipo di e Universidad a descubri un metodo pa mata cancer di prostaat, pecho, pulmon y otro tipo di cancer den pruebanan di laboratorio.
Conocido actor di novela Raul Amundaray a bay sosega
HOUSTON – E conocido actor Venezolano Raul Amundaray a bay sosega diamars na edad di 84 aña di edad. Un persona cu pa generacion di añanan 70, y 80 tabata super popular pa tur e telenovelanan cu el a participa aden. E tabatin un relacion special cu Aruba y a te hasta casa cu un persona di aki pa un tempo. For di e matrimonio a nace tres yiu. Ultimo añanan el a muda pa Houston Texas. Eynan el a sigui su bida, y te hasta crea un lugar pa entrena actornan di futuro.
Bogaerts: Scandal di seña lo no afecta titulo di Red Sox di 2018
BOSTON – E investigacion di Major League Baseball den e scandal di hortamento di seña, lo no afecta e titulo di Serie Mundial di Boston Red Sox di 2018. Por lo menos asina e pelotero di Aruba Xander Bogaerts ta pensa y a declara na e portal di noticia deportivo ESPN. E siman aki e manager di e ekipo Alex Cora a haya su retiro debi na e scandal. Y ta tin miedo cu e titulo cu e ekipo tin di Serie Mundial lo wordo perdi tambe y anula. “Nah, absolutamente cu no” Bogaerts a bisa. E ta e prome di e ekipo campeon cu a comenta riba e scandal. Segun Bogearts, desde e scandal y e noticia di retiro di Cora, el a wak e pero no a toca e tema. “Mi a papia cu ne algun biaha. Ta lamentable cu e no ta bolbe como manager y e persona cu e tabata cu nos. No por tin ningn hende den e club cu tin un problema cu ne of por bisa algo malo di dje”. El a bisa cu e no a papia cu ningun hende di MLB riba e investigacion riba e ekipo y a nenga di duna comentario riba e proceso. Segun Bogaerts, aunke cu Houston (e ekipo central den e scandal di hortamento di seña) a elimina Boston den e prome round di playoff na 2017 (e aña di e scandal) Bogaerts a duna Astros e credito y no a cuestiona e titulo di serie mundial cu Astros a gana e aña ey. Segun Bogaerts, nunca e no a nota algo diferente durante e weganan na Houston. “Homber, nan tabatin un bon ekipo, nan tabatin un great team. Hunga den e parke ey no ta facil y e guynan ey tabatin un bon team” Bogaerts a sigui bisa. Segun e pelotero, prome biaha cu el a tende di e scandal ta ora cu e noticia a plama. “Mi no tabatin idea mes (cu esey a sosode)”. E ta bisa di lo sinti falta di Cora, y ta duna credito na Cora pa su logronan ultimo. “El a yudami yega na e siguiente nivel cu mi kier a yega. Mi ta hopi gradicido na dje”. Faltando un luna prome cu spring break cuminsa, e ta sinti straño honestamente, pa no tin un manager awor.
Follow NoticiaCla
