Avioneta accidenta lo keda desmantela dentro di poco

ORANJESTAD – E avioneta piper cu a accidenta algun tempo atras na Calabas, lo keda desmantela dentro di poco. Asina e mandatario encarga cu Transporte Chris Romero a bisa durante un conferencia di prensa. Hopi informacion nobo no a duna ya cu e investigacion no ta completamente cla. Loke por a bisa ta cu dentro di poco lo desmantela e avion, prome e halanan y despues e otro parti di e avion. E avion no ta ‘usabel’ mas mirando e estado cu el a keda. Tambe a confirma cu e dos personanan abordo a bandona Aruba caba, ya cu nan presencia no tabata rekeri mas. 

GASOLINE

Falta di gasoline ta keda e motibo principal di e accidente aki segun e mandatario, aunke cu e investigacion no ta full cla ainda. E loke a sosode, no ta viola ningun regla y esnan abordo no a comete nada illegal, pa cual nan mester a keda Aruba y responde pa nan acto. A confirma cu ministerio publico no a haya necesario pa detene nan, ya cu no ta considera cu a comete algo penal. 

DESMANTELA PARTI

Segun director di Aviacion Civil, Edwin Kelly, a confirma cu ladronan den e prome 8 ora despues cu e avion a aterisa forsosamente, a horta e GPS mobil di e avion. Despues di esey, a pone seguridad, pero ya a bay cu e parti menciona. Despues autoridad a desmantela cierto parti di e motor y avion, pa evita cu hende por a horta esaki y bende riba mercado preto. No a specifica ki parti a desmantela pa e parti aki. 

E CASO

E avioneta Piper accidenta diamars anochi (19 di februari ultimo) den mondi na Aruba, a keda casi intacto despues di impacto. Por lo menos for di bista di e potretnan cortesia di Aruba drones, e diaranson mainta siguiente. E potretnan ta duna un miho bista di con e avioneta a keda despues di a ‘cay’ den mondi na Calabas. Investigacion di autoridadnan competente mester saca afo exactamente kico a pasa cu e avion finalmente a bin cay den e mondi menciona. 

FLIGHT PLAN

Informacion cu NoticiaCla a publica e tempo di e suseso, ta cu e piloto lo a file un plan di buelo, esta un flight plan, a base di bista visual (VFR), osea Visual Flight Rules enbez di bula a base di instrumento, IFR Instrument Flight Rules, cu ta normal ora cu bula avion den oranan di anochi y ta usa instrumentonan. No por kita afo cu a file e plan di buelo pensando cu lo a yega den dia, pues cu no tabata necesario pa bula IFR. 

TIPO DI AVION

Ademas, tin tambe e tipo di avion cu a usa pa e tipo di buelo aki, cu no ta esun mas comun pa un buelo di un distancia asina largo, aunke e no ta imposibel. E tipo di avion aki, esta e Piper PA-38-112 Tomahawk ta un avion di dos persona (un asiento pa piloto y uno pa un pasahero) cu tin su tren di aterisahe fiho y tin un solo motor, y e avion ta diseña pa entrena un persona pa siña bula avion, pa tours y pa uso personal, pero no pa buelo commercial. Pues pa bula e avion aki te Aruba (distancia di 438 miya y e avion por yega un distancia di 539 miya), mester tin experiencia y hopi gasoline. Algo cu den e caso aki tabata probable causa di e problema. 

KICO A PASA?

Segun informacion preliminary, e dos personanan a bordo di e avioneta Piper PA 38-112 Tomahack a informa autoridad cu tabatin un biento fuerte y problema cu gasoline. Potretnan saca cortesia di Aruba Drones diaranson mainta ta duna un bista miho di con e avion a keda despues cu el a ‘cay’ den mondi na Calabas.