Colegio Arubano awor ta conta cu infrastructura di informatica avansa

ORANJESTAD – For di algun luna caba, alumno y maestronan di Colegio Arubano (Playa) ta gozando di un infrastructura di informatica avansa, cu ta haci nan ‘futureproof’. Un inversion cuantioso cu a bin di parti di e compania di telecomunicacion SETAR, segun su director Roland Croes, pasobra e ta algo cu e compania ta para pe, esta educacion pa nos hobennan. Un idea cu a cuminsa un aña pasa, presenta pa hunta di supervision di SMOA (Stichting Middelbaar Onderwijs Aruba), y realisa un aña despues. Awe, Colegio Arubano ta prepara pa por aplica cualkier faceta di tecnologia na henter e scol, sin ningun problema.

Segun Croes, un red cu ta funciona optimalmente ta hopi importante (incluyendo un conexion super rapido di internet) y cu tin suficiente computer cu ta traha bon y cu ta bon protegi, ta haci un diferencia. Despues cu a tuma e decision pa acepta e reto, a prepara y drecha un espacio special segun e standardnan y e exigencianan profesional e internacional pa aloca e server (e curason di e infra-structura cu ta conecta di un banda riba tur e ICT infra - structura cu tin na Colegio Arubano y di otro banda cu SETAR) caminda por y na unda a instala cabelnan pa tur e localidadnan na Colegio Arubano, incluyendo   localidad “Emma”. Esaki ta nifica cu tur klaslokaal (80), tur oficina (10), e mediatheek/bibliotheek y e espacio unda e docentenan ta traha, tin conexion di internet.

SETAR a instala un red super rapido riba un backbone di fibra optica riba un speed di Gbps. Den cada klaslokaal tin un conexion permanente y pa cada 2 klaslokaal lo tin acerca un wireless access point. Cu esaki tur alumno di Colegio Arubano lo por tin acceso na internet rapido pa nan laptop, tablet of smartphone na un manera hopi sigur. Den e dianan aki tur alumno a ricibi nan password pa subi internet. SETAR a duna di su parti un cooperacion den aparato, programacion y orario di trabou pa realisa e proyecto bunita e importante aki. Colegio Arubano tambe mester a inverti financieramente. Cu e proyecto aki Colegio Arubano ta drenta den un era nobo pa loke ta facilidad y uzo di internet.

Te cu recientemente e situacion tawata asina cu e capacidad di internet cu tawata tin pa un scol grandi manera Colegio Arubano tabata comparabel cu locual ta pa uzo di un cas di famia. Door di esaki Colegio Arubano pa varios aña no por a duna ni e minimo na servicio pa e usuarionan (e docentenan y personal administrativo tampoco pa e alumnonan) di internet na Colegio Arubano. Cu e alumnonan pronto tambe tin acceso pa internet door di e facilidad di Wi-Fi, ta manera un soño cu ta bira realidad. Ta bin acerca cu e velocidad den cual e transmision di informacion tawata tuma luga (si uberhaupt esaki tawata posibel) tawata sosode cu speed nan hopi abou. Ora cu por fin durante les por a habri un website, e les a pasa. Esaki pues tambe ta pasado, tur cos ta bay “superliher”.

Pa menciona djis algun beneficio. Colegio ta traha ya pa basta aña caba cu Magister, cu ta un leerlingvolgsysteem. E acceso pa e punto aki por sosode desde awo sin ningun problema tecnico cu ta relata directo cu internet. Ta bira posibel pa cada docente, tur momento cu e tin necesidad pa esaki den cuadro di su les, e por haci algo of laga e alumno haci un of otro encargo/ tarea via internet. Un mundo nobo y interesante ta habri den klaslokaal.