Parlamentario Heyliger di St Maarten suspende di Parlamento

PHILIPSBURG – Parlamentario di St Maarten Theo Heyliger a keda oficialmente suspende di Parlamento, despues cu a prolonga su detencion diabierna ultimo cu 8 dia mas. E parlamentario ta wordo sospecho di soborno entre otro. Di otro banda, miembronan di Parlamento di St Maarten ta sigui reuni, aunke e reunionan por wordo considera illegal y no valido. Articulo 45 di constitucion di St Maarten ta bisa cu Parlamento ta consisti di 15 miembro. Articulo 50 ta stipula cu ora cu un Parlamentario ta den detencion preliminar, e ta suspende automaticamente di Parlamento, pero no ta perde su asiento te ora cu e keda sentencia. Problema awor ta cu Parlamento parse di no sa con pa sigui awor, aunke cu regla ta determina ken tin cu sigui awor na lugar di Heyliger. E persona ey ta Jules James.