Polis hopi visible y servicial durante paradanan di Carnaval

ORANJESTAD – Durante fin di siman grandi di carnaval, polis (mescos cu otro departamentonan) tabata hopi visible riba caminda. No solamente visible, pero tambe notablemente servicial, mustrando un bista diferente di e cuerpo. Hopi atencion a bay na duna informacion, conecta cu e comunidad, y mustra asina un cara diferente cu tin semper di polis. Hopi ta wak e polis como e persona cu ta bin solamente ora cu tin problema. Pero durante henter periodo di carnaval, polis a mustra un biaha mas cu nan tey pa duna e servicio y cu nan no tey solamente den malo pero den bon tambe. NoticiaCla mes tabata testigo di esaki durante parada. Y notablemente, e aña aki tabatin menos 'dolor di cabez' cu polis durante paradanan, unda cu pa varios di nan, tabatin menos detencion cu e aña anterior.