Yrausquin a haya overbruggingstoelage pero no ta traha pa Bermudez

ORANJESTAD – “ Juan David Yrausquin no ta mi consehero” asina minister di finanza Angel Bermudez ta bisa di su predecesor. Segun e mandatario e biaha aki un fraccion den oposicion den Parlamento a dirigi algun pregunta na e mandatario di finanzas, cu e no tabatin problema pa aclaria y asina evita cualkier mal comprondemento. Mes momento Bermudez a confirma tambe cu Yrausquin a haya e asina yama ‘overbruggings toelage’ cu e tabatin derecho di dje, ora cu e la retira como minister na juni ultimo. Segun Bermudez, esaki ta permiti’e conta cu un forma di entrada, durante un periodo limita como un ex-mandatario, tur esten cu Yrausquin haya un otro funcion of trabou caminda e lo ricibi un entrada fiho, “den esey no tin nada particular”, e mandatario a indica.

Bermudez a rechasa e comentarionan mes momento, cu ta circula tocante e supuesto funcion di Juan David Yrausquin den su departamento y ta enfatisa lo siguiente: “Sr. Yrauquin no tin ningun contracto cu mi of cu Gobierno, e no ta mi ‘chief of staff’ ni tampoco miembro di mi staff permanente manera cu ta wordo comenta”. Segun Bermudez, ta su prerogativo y e ta consult’e (Yrausquin) ora e ta haya oportuno pa e por yega na continuidad den su maneho di e ministerio aki y e consultanan ey no ta wordo paga den ningun forma, Minister Bermudez a sigui bisa. E consultanan cu Sr. Yrausquin ta ‘pro bono’, pues e consultanan aki no tin costo y na momento cu Minister Bermudez ta considera esaki necesario, ta rekeri di informacion of antecedentenan relaciona cu un situacion actual y cu ta concerni su cartera e ta haci su consulta.

OPOSICION

Mientrastanto, miembro di lider di fraccion di oposicion MEP Adi Thijsen, ta mustra cu berdad tin derecho pa tuma e overbruggings toelage. A manda un carta pa e minister di finanza, unda cu ta cuestiona e supuesto otro trabou cu Yrausquin lo tin den despacio di e actual minister, y como tal si e areglo di overbrugging ta 'van toepassing' den e caso aki. Tambe ta cuestiona Bermudez, si Yrausquin a informa si e la informa Bermudez di extra trabounan cu ta wordo haci. Tambe pakico e calculacion di e overbruggings toelage no a bin hunto cu e landsbesluit. Tambe a cuestioan pakico no a informa parlamento di e caso aki. Y finalmente a puntra Bermudez, si Yrausquin tin un contracto actual cu sea gobierno y /of minister di finanzas. Si e contesta ta afirmativo, kier pa suministra un copia di e contracto aki. Pues por nota cu e preguntanan di MEP, a haya contesta di Bermudez.