Dump na Parkietenbos un biaha mas na candela

ORANJESTAD – Despues di algun tempo di no a tende nada di e problema, dialuna mainta e dump na Parkietenbos a bolbe lanta parcialmente na candela. Cu tur e problemanan cu esaki ta trece pa tur hende, esaki a para bira un pesadiya, primordialmente pa habitantenan di Parkietenbos y besindario, debi na e molester di huma y tur otro problema di salud cu esaki por crea. Mientra cu gobierno ta trahando duro pa resolve e problema di e candela aki y e dump, malechornan ta sigui haci daño, aunke por bien ta cu ta naturalesa ta ‘cende’ e candela aki debi na factornan natural. Por ehemple, solo, tipo di material y e condicion cu ta laga e candela aki cende. Cualkier cu e motibo ta, e hecho ta keda cu e candela ta un problema serio di salud pa esnan den besindario.