Parlamentario Heyliger a keda traslada pa prison na Bonaire

PHILLIPSBURG – Parlamentario di St Maarten Theo Heyliger a keda traslada pa prison na Bonaire diabierna atardi, for di e prison di warda di polis den e capital Phillipsburg. Esaki despues cu mas prome den dia su detencion a keda prolonga cu 8 dia. Vocero di Ministerio Publico Roderick Gouverneur a confirma esaki pa NoticiaCla diabierna atardi. A detene e Parlamentario un siman prome, y ta sospech’e di e.o. soborno den e caso Larimar. Motibo di e traslado ta pasobra e prison di Point Blanche a yega su maximo capacidad di detenido.  

MEDIDA NOBO

Ministerio Publico a stipula un maneho nobo y a participa esaki pa loke ta e detencion di detenido. E maneho aki ta asina pa cumpli cu e derecho fundamental di hende. Como consecuencia, un detenido por keda deteni maximo di 10 dia den e warda di polis di Phillipsburg. Menornan di edad no por keda deteni mas cu 3 dia den e cel, no obstante e delito. E capacidad maximo  di Point Blanche ta pa 70 detenido, y asina mes investigadornan ta observa e condicion di detencion hopi critica tur ora. Como consecuencia ministerio public mester a laga 3 detenido liber pasobra sobrepoblacion lo ta violacion di derecho humano. E detenidonan aki a pasa mayoria di nan condena caba y lo keda den libertad toch na maart di 2019, esta awor.  OM ta premira deterioro di e capacidad di Point Blanche, ya cu Corsou a anuncia caba cu lo manda 7 detenido St Maarten bek. 

TRASLADO 

E traslado di Heyliger ta debi cu, teniendo cuenta cu su prolongacion di detencion, e lo a surpasa e maximo di 10 dia den prison na e warda di polis. Como tal, ta cera Heyliger na Bonaire temporalmente, cu ta e facilidad mas cerca, cu tin suficiente capacidad.