CAFT awor kier controla mas fondo di gobierno tambe

ORANJESTAD – E colegio di supervision financiero di Aruba CAFt kier tin un miho control financiero riba varios fondo di gobierno durante 2019. Como tal den su reaccion di 7 pagina riba e asina yama ‘Uitvoerings raportage’ final di 2018, CAFT awor kier un raportahe di cuartal no solamente di e presupuesto, y e Social Crisis Plan, sino tambe pa e Tourism Enhancement Product Fund (TEPF), Fondo di Enseñansa, Fondo di Criminalidad, y esun di Aruba Tourism Authority. Argumento principal pa esaki ta cu tur e fondonan ta wordo alimenta pa e presupuesto di pais Aruba.

COMPLIMENT CU MAS ACCION

Mientras cu e colegio a cuminsa si na duna e minister encarga cu finanzas un compliment pa a cumpli cu e acuerdonan segun e protocol, pero atrobe, kier mas accion. CAFT ta contento cu gobierno a ricibi mas entrada na winstbelasting, (13.2 miyon), pero ta preocupa cu na grondbelasting a ricibi 12.6 miyon menos. Esaki ta  parti di e asina yama no cumplimento di nos comunidad, cu ta keda un problema segun CAFT. Algo cu departamento di impuesto a confirma tambe, pero ta trahando ariba pa mehora. Menos BBO tambe a keda registra unda cu a ricibi ‘apenas’ 6.9 miyon. Tur atrobe, pa e compliance, cu no ta manera e mester ta. 

AUMENTO ACCIJNS NO A YUDA

Loke ta hala atencion tambe ta cu e aumento di accijns riba gasoline, no a yuda ya cu no a genera e entrada cu a spera. Tin varios factor cu CAFT a nota, pero segun gobierno su splicacion, un di nan ta cu hopi hende a cuminsa ‘importa autonan hybrid’, cu ta causa reduccion drastico den uso di gasoline. Y e post mas grandi di gasto, segun CAFT ta keda personal. Algo cu gobierno ta mehorando, pero no suficientemente ainda. Ta spera cu esaki takeda bou di e suma acorda. 

USO DI ENTRADA INCIDENTAL

CAFt a nota cu gobierno a paga 39.9 miyon na reparatie toeslag, pero cu a usa medionan incidental pa cubri gastonan structural, manera e reparatie toeslag. Algo cu a pidi pa no haci. A pidi pa usa entradanan incidental, pa cubri e deficit specificamente. Lesa e comentario completo di CAFT AKI.