Croes: Raportahe di SCP necesario pa sigura e exito di su ehecucion

ORANJESTAD – E raportahe di e asina yama Sociaal Crisis Plan (SCP) ta necesario pa sigura e exito di su ehecucion. Asina Minister encarga cu cartera di Asuntonan Social, Glenbert Croes a declara diabierna. E siman aki tambe, e colegio di supervision financiero esta CAFt a bolbe remarca den nan reaccion riba e 'Uitvoerings Raportage' #4 di presupuesto 2018, cu nan tambe (esta CAFt:red) kier wak raportahenan tur cuartal di e fondo pa SCP. 

REUNION 

E siman cu a pasa Croes conhuntamente cu Parlamentario Sue Ann Ras ,-cu ta presidi e Comision di Supervision-, Sra. Glenda Hernandez encarga cu implementacion di e Crisisplan Social como directora di Departamento di Asunto Social encarga, Sra. Mary Ann Curet di Departamento di Asunto Finanzas acompaña pa Sra. Marlies Filbri di e instancia internacional Unicef, a sinta cu henter e sector social cu ta forma parti integral di e Crisisplan Social. 

META 

Meta di e encuentro aki tabata pa ricibi un raportahe di con e ehecucion ta bayendo. Mayoria di biaha un proyecto riba papel ta mustra  mas facil cu su ehecucion practico. P'esey e raportahe tabata sumamente balioso pa scucha e Sector Social kende ta esunnan cu ta traha riba field, kendenan ta envolvi den e ehecucion fisico di e plan, kendenan por informa bo di kico ta funciona realmente y kico mester ahusta.

FRUCTIFERO

Croes a considera e reunionnan aki sumamente fructifero di por a scucha di cada stakeholder kico ta nan preocupacion, cua cambio ta conseha of cu lo kier mira adapta. Tabata 3 dia intenso di reunion unda cu a scucha un pa un separa, reuniendo cu 24 stakeholder den su totalidad. “ Nos mester ta autocritico den e problemanan social cu nos ta bibando na Aruba. Nos no ta yama pa papia bunita di loke cu ta bayendo malo. Nos mester bisa e cosnan cu e berdad pa nos por bay traha mas efectivo riba e solucionnan." Croes a bisa. Despues di e raportahe e mandatario ta conclui cu e sector completo ta trahando cu un consenshi y curason grandi pa logra e progreso social den bida di tur famia aki na Aruba.