Aruba ta promove ciclismo na Boston cu “Aruba Bike Party”

ORANJESTAD/BOSTON - Ya ta algun dia caba cu riba social media nos por a mira anuncio special di “Oranjestad-Aruba Sister Cities Association” di su iniciativa di mas nobo: “Aruba Bike Party”. 

Esaki ta un proyecto   cu ta hiba nos isla den un dimension nobo   y cu lo celebra su prome edicion na luna di Juli proximo den e ciudad historico di Boston, na e estado di Massachussets. E proposito di “Aruba Bike Party” ta pa sigui conscientisa di e importancia di 

ciclismo no solamente na Boston, pero tambe riba nos isla. E iniciativa ta wordo inspira parcialmente door di e documentario Hulandes: “Why we cycle”, cu ta enfoka riba e multiple beneficionan di e moda simpel di transporte aki.“Aruba Bike Party” cu lo ta un evento deportivo hopi festivo, ta planea pa bira algo anual y lo celebra e relacion special entre e habitantenan di e ciudad di Boston y e habitantenan di nos isla. E intencion ta pa e evento aki wordo haci den ambos comunidad ruman, tanto na Boston como na Aruba mes. Pa 2019, e tema lo ta “The Orange Carnival” pa duna honor na capital di Aruba. 

Manera ya nos a remarca, e iniciativa aki ta un creacion di e miembronan di “Oranjestad-Aruba Sister Cities Association” (OASCA). OASCA ta un organisacion non-profit y no-gubernamental cu ta promove y encurasha interaccion entre ciudadanonan di mundo, conectividad global, trabao boluntario y paz. Sr. Peter Cheung, un yiu di tera residenciando den e ciudad di Boston pa varios aña caba y tambe miembro di OASCA su Directiva Consultativo, a wordo apunta como e lider di “Aruba Bike Party” 2019. Pa cu e iniciativa aki, apoyo sumamente valioso y importante a wordo duna door di lidernan den ciclismo na Aruba cu ta Sr. Jurgen van Schaijk, Sra. Hilde Rodriguez-Taekema, Sra. Suzan van der Sluis y Sra. Annemarie Melchers cu ta personanan cu tin añas conscientisando di e importancia di ciclismo. Na aña 2016, e ciudad di Doral na Florida a bira Oranjestad su prome ciudad ruman. E propuesta, meta y compromiso di OASCA ta pa logra cu mas ciudad specialmente na Merca, por comberti nan mes den ciudadnan ruman di Aruba/Oranjestad, incluyendo e ciudad di Boston. Ta importante pa nos ta consciente cu via e plataforma “Sister Cities International” cu a cuminsa existi na final di segunda guera mundial danki na Presidente Americano Eisenhower, nos por sigui crea puentenan importante entre nos isla y pueblonan rond di mundo y asina practica “Diplomacia Ciudadano”. Asina mas paz, tolerancia, comprension, hermandad, respet mutuo y inclusion ta wordo promovi. Algo cu mundo tin hopi mester di dje den e temponan desafiante aki. OASCA ta convenci cu e creatividad di nos hendenan como un recurso valioso y tambe e gana di crea oportunidad y adelanto pa nos mes, lo ta e forzanan determinante cu lo sigura cu nos ciudadanonan lo yega nan maximo potencial riba un plataforma mundial. Via acuerdonan di “Sister City”, nos hendenan tin e oportunidad unico di crea proyectonan y intercambionan den diferente ramo (Artistico/Cultural, Deportivo, Scientifico etc.) y asina beneficia di oportunidadnan infinito cu esaki ta trece cune.Si bo tambe kier forma parti di “Aruba Bike Party”, of si bo tambe kier yuda plama e noticia di algo asina positivo, nos ta invita bo pa bishita e pagina di “Aruba Bike Party” riba Facebook pa mas informacion.  Join the Orange Carnival!