OM a exigi bida largo di prison pa conocido criminal Holleeder

AMSTERDAM – Si ta pa Ministerio Publico di Hulanda, e conocido criminal mas popular di Hulanda Willem Holleeder (60) ta bay cera pa bida largo. Segun OM, e ta co-responsabel pa por lo menos 5 likidacion den e periodo 2003-2006. Corte ta dicta sentencia na juli proximo. “ E castigo mester evita cu e sospechoso por haya e posibilidad pa continua cu su ‘practica’” segun e fiscal. Ta trata di asesinatonan contra Cor van Hout, Kees Houtman, Thomas van der Bijl, Willem Endstra y John Mieremet. Holleeder tabata responsabel tambe pa e secuestro di e doño di Heineken hopi aña pasa. 

DESMENTI

Holleeder no a mustra compassion y a te hasta refuta e acusacionan. “Mi no a duna niun pero niun hende orden pa likidacion” Holleeder a bisa den corte. “No tin ningun hende cu por bisa esey dimi” e criminal a bisa caba. Ta yame criminal pasobra el a keda sentencia den pasado caba pa crimenan cometi. Abogadonan di Holleeder a sigura cu nan mester di por lo menos 5 dia pa nan defensa, cu a cuminsa ayera. E proceso mes a cuminsa na februari di aña pasa. Desde e momento ey a scucha 62 testigo, reparti riba 50 dia.  E rumanan di Holleeder, Astrid y Soña y su ex, tambe a testigua contra dje.