Disputa entre Hulanda y Aruba riba Henk Kamp ta sigui

ORANJESTAD – Tanto Aruba como Hulanda ta keda para riba nan punto, pa loke ta e candidatura di un miembro di e colegio di supervision financiero CAft. Aruba ta haya cu e representante di Hulanda Henk Kamp mester retira, y Hulanda ta bisa cu no tin nada di papia riba e tema y cu tur cos ta bon asina. Kamp su nombracion lo ta ‘ilegal’ segun ley di LAft, pero Hulanda a argumenta cu Aruba mes a bay di acuerdo cu e nombracion y esey ta haci e situacion actual posibel. Aruba ta sigura cu nan a protesta ora cu Kamp a keda nombra. Hulanda ta disputa esaki. 

SHOWDOWN 

Mes momento, Gobierno di Aruba no ta sinti cu tin un ‘showdown’ cu Hulanda riba e tema. Por lo menos asina por sinti di parti di Prome Minister di Aruba Evelyn Wever cu a reacciona riba esaki diahuebs mainta durante un conferencia di prensa. Segun Wever, Gobierno di Aruba no ta considera e declaracionan di secretario di Estado Hulandes Raymond Knops riba e tema di CAFt su miembro Henk Kamp, como ‘pisa’. Knops den un reaccion hopi cortico e siman aki, a bisa Tweede Kamer (Parlamento di Hulanda) cu no tin nada di papia riba e tema, y cu e ta un asunto cla. Pues no ta bay sigui discuti e nombracion di Kamp, y cu Kamp ta keda como miembro di Hulanda pa CAFT. Esey siendo cu gobierno di Aruba a protesta.

MENSAHE DI PARLAMENTO

Segun Wever, e mensahe cu Parlamento a duna recientemente ta cu mientras cu CAFt ta keda insisti y mustra riba regla, cu CAFT tambe mester tene nan mes na regla. Y esey ta inclui den e caso aki, e hecho cu e miembro di Hulanda, esta Henk Kamp, mester keda reemplaza pasobra segun ley di LAft, e no por ta miembro. “Pa mi no tin mucho cos cu a cambia” Wever a sigura e portal aki. Tanto Aruba como Hulanda a expresa nan mes riba e tema. “Na fin di dia ta Parlamento nos lo bay cu e leynan y Parlamento lo tin ultimo palabra”, Wever a sigui bisa. 

RMR TIN ULTIMO PALABRA

NoticiaCla a confronta Wever cu e hecho cu segun e protocol, unabez cu Parlamento di Aruba aproba e ley nobo di LAFt, cu ta Rijks Minister Raad (RMR)  tin e ultimo palabra y tin cu aproba esaki ainda, aunke cu Parlamento ta esun cu mester tin e ultimo palabra. Basa riba esaki, mirando cu Knops ta forma parti di RMR, e hecho cu el a duna su opinion, a puntra e mandatario si esaki no ta pisa hopi pasobra na final di dia ta nan (RMR)ta dicidi, y Knops ta parti di RMR. “Mi no ta kere cu su palabranan ta mucho pisa” Wever a sigui bisa. Como tal Wever tin confiansa cu na final, tur cos lo cana bon.