Clientenan cu no ta di Serlimar lo keda exonera danki na mocion di Parlamento

ORANJESTAD – Ta danki na e mocion presenta recientemente den Parlamento durante tratamento di e asunto di Serlimar, cu ciudadanonan cu tin otro servicio cu no ta Serlimar, no tin cu paga Serlimar mas. Esey kier men cu si bo tin un otro compania contrata pa recohe sushi di cas, manera EcoTech, bo no ta wordo cobra pa Serlimar. Minister di medio ambiente responsabel pa Serlimar Otmar Oduber a confirma esaki pa NoticiaCla diahuebs mainta. Serlimar mientrastanto den un aviso recien, a subraya esaki tambe. 

MOCION

E mocion tabata indica cu un persona cu ta haya servicio di recohe sushi for di un otro compania cu Serlimar, ta wordo ‘exonera’ un parti di e cobransa cu ta wordo haci cu ta e parti di recohe sushi. Ta trata di e suma di 25 florin mensual. “Den e caso aki nos ta respeta e ora e interpretacion aki di Parlamento, y a base di esaki, e ora Serlimar ta ehecuta e mocion di Parlamento” Oduber a sigui bisa. Nan, esnan cu ta usand servicio di e.o. EcoTech of otro servicio, mester mustra nan comprobante na Serlimar y nan lo wordo exonera di e cobransa. “Serlimar na su turno, lo cobra  e di tercer persona of compania, cu ta dunando e servicio pa loke ta parti di maneho di sushi. E cobransa ta cuminsa entrante 1 di maart 2019, aunke cu e cliente lo ricibi su cobransa na juni proximo. Eynan e cliente ta dicidi si ta paga mensual, cuartal of pa aña, e suma di 25 florin.