Rapport Tourism Maturity: Evalua seriamente si mester mas hotel

ORANJESTAD – Esnan cu ta encarga pa dirigi turismo y e politica rond di dje, mester seriamente considera si traha hotel nobo pa aumenta e cantidad di camber y si esaki ta e forma mas eficiente di uso di recurso. Asina e rapport publica riba e portal di  Banco Central di Aruba, ‘Tourism Maturity in Aruba ta sugeri. E ta un rapport traha aña pasa pa Edwina Pereira y Giancarlo Croes, ambos trahando na Banco Central. E rapport sinembargo, no necesariamente ta refleha e pensamento di Banco Central di Aruba, segun mencion den e rapport kes. Nan a haci e investigacion necesario pa determina Aruba su nivel di turismo actual. Y e conclusion ta cu Aruba su turismo ta stagna. 

INDICADORNAN

Manera esnan responsabel pa e raportahe,   Pereira y  Croes, ta bisa den nan conclusion, nan a evalua un cantidad di indicador turistico pa por indica e estado di desaroyo di nos turismo, usando e metodo Haywood. E resultado ta cu e densidad di e mercado ta den e fase di consolidacion, mayoria di e indicadornan ta mustra cu Aruba ta den e fase di stagnacion. Pero segun e rapport, e bon noticia ta cu e sector no a yega e punto final ainda cu ta pone cu e mester conoce un caida. Esaki basa riba e cantidad di camber alternativo ta wordo inclui den conteo di e inventario di camber a sigui crece, cu por ta un señal di rejuvenecemento di e sector aki.  

DIVERSIFICACION

E diversificacion den turismo na necesario manera cu e rapport ta sugeri, pasobra ‘e sector turistico no ta suficiente pa fungi como e motor di e crecemento economico di Aruba’. Esaki si esnan cu ta dirigi turismo opta pa usa e mesun modelo di crecemento. 

ARUBA TOURISM AUTHORITY 

E CEO di Aruba Tourism Authority Ronella Tjin Asjoe a confirma pa NoticiaCla cu e ta na altura di e rapport, pero e momento ey no por a duna un comentario ainda, pa motibo di tempo. E lo haci esaki proximamente. Por mira e rapport completo AKI. Potret Aruba Destination.