Ruiz: Aruba no mester paga e regalo miyonario di Union Europeo bek

TAHITI – E suma miyonario cu gobierno di Aruba lo ricibi di Union Europeo, no ta un fiansa cu Aruba tin cu paga bek. Asina e mandatario di Finanza Xiomara Ruiz Maduro a bisa e siman aki for di Tahiti. E siman aki ta tumando luga e ‘17th OCT-EU Forum y OCTA Ministerial Conference’ na Tahiti, Polynesia Frances. Como Aruba su Territorial Authorizing Officer (TAO), Minister di Finansa, Xiomara Ruiz-Maduro ta presente na ambos e Forum y e Conferencia importante aki cu sigur ta na beneficio di nos pais. 

Ruiz-Maduro a duna di conoce cu e meta di su presencia na e Forum di OCT-EU y e conferencia di OCTA ta pa, como TAO, finalisa y firma e acuerdonan necesario pa asina Aruba por ricibi e suma di 13,6 miyon EURO for di Union Europeo pa por institui un SISSTEM Faculty na Universidad di Aruba. E facultad nobo aki lo brinda educacion riba nivel di bachelor y master den e ramo di Sciencia, Technologia y Matematica, y Sostenibilidad respectivamente. 

Banda di esaki e facultad di SISSTEM lo facilita e implementacion di programanan di investigacion y innovacion cu ta resulta den promove publicacion y programa di certificacion riba e tereno di sostenibilidad.

Aruba na varios ocacion a ricibi fondo Europeo pa por a realisa proyectonan na beneficio di nos comunidad, entre otro; Museo Archeologico; Parke Arikok; Marine Park; Erasmus Fund pa Universidad di Aruba y awor e SISSTEM Faculty lo bira realidad por medio di e 11 Fondo di Desaroyo Europeo. 

Pa acomoda y desaroya e Facultad di SISSTEM, Maria Convent lo wordo renoba den cooperacion cu UNDP, cu ta e programa di desaroyo di Nacionnan Uni, y Universidad Catolico di Leuven, KU Leuven, cu lo yuda pa desaroya e curiculum pa e facultad. “Esaki no ta un fiansa, e no ta un debe cu nos a traha. Esaki ta un regalo cu nos a haya di Union Europeo pa cual e 13.6 Euro aki ta bale la pena tur e esfuersonan cu Pais Aruba a haci pa yega na e fondonan aki y pa e fondonan aki wordo destina pa un SISSTEM Faculty na Universidad di Aruba”, Minister Xiomara Ruiz-Maduro a enfatisa.