Post riba Facebook por costa bo bo trabou!

ORANJESTAD - Hopi persona, entre otro empleadonan, ta hasi uso di Facebook cu diferente motibo, manera por ehempel pa duna nan opinion of pa hasi remarque riba Facebook posts di otronan. Tin biaha un empleado no ta para keto cu un post riba Facebook por causa cu e ta perde su trabou.

Usa e argumento di libertad di expresion of bisa cu e remarque a wordo hasi riba titulo personal no ta hasi cu un empleado no por wordo kita op staande voet of cu no por pidi pa hues termina e contrato laboral via un "ontbinding". Den un articulo reproduci cu permiso di bufete Gomez & Coffie, presenta pa abogado Bryan Cofie, nan ta splica e asunto aki bon. Corte ("Gerecht in Eerste Aanleg van Aruba") na diferente ocasion a disidi cu tin limitenan na e libertad di expresion ora ta trata disputanan entre dunadornan di trabou y empleadonan. Un ehempel recien ta un caso den corte caminda AIB Bank a pidi nos Corte pa termina e contrato laboral cu un empleado. Corte a honra e peticion.

E motibo pa e peticion (en corto) tabata cu e empleado como reaccion riba un post publico riba Facebook a incrimina dos cliente di su dunador di trabou di soborno ("omkoping"). E hues a hanja cu e remarque di e empleada riba Facebook a viola e "Code of Conduct and Ethics" di AIB, e obligacion di secrecia y e posicion di e empleado den AIB. Pa e hues no tabata decisivo cu AIB no tabata tin un maneho riba social media.

Den 2016 corte a disidi cu un empleada por a wordo kita op staande voet dor di a usa lenguaje hopi grosero riba Facebook dirigi contra coleganan. Por conclui cu libertad di expresion tin limite, tambe riba Facebook. Esaki ta importante pa tene cuenta cu ne, no solamente dor di dunadornan di trabou, pero tambe dor di empleadonan.

Pa mas informacion di e caso click riba e link: http://deeplink.rechtspraak.nl/uitspraak…