Trailernan temporal di Colegio San Antonio na Dakota a haya airco

ORANJESTAD — E trailernan na Dakota den cual e 406 alumnonan di Colegio San Antonio Mavo ta hayando les, tin airco aden. Cu esaki, minister di enseñansa Michelle Hooyboer Winklaar a cumpli cu algun di e promesa haci siman pasa ora cu e alumno y maestronan a bay den accion. E vespertino Amigoe, ta raporta esaki den nan edicion di diamars. Den e raportahe aki, nan ta combersa cu e director interino di e scol Ingrid Nicolaas, cu ta confirma esaki. “Trahadonan a labora henter weekend” Nicolaas a bisa. Loke esaki ta nifica, ta cu esnan di e examenklassen, por a haci nan Schriftelijk Onderziek den un klas cu airco, enves di e calor insoportable.

Tabata siman pasa diahuebs cu e welga a tuma lugar den oranan di mainta. Mientrastanto pa e merdia ey, representante di minister a bin, y no a acepta invitacion di e maestronan di Colegio San Antonio pa papia cu nan como docente cu a organisa e accion di diahuebs mainta. Esaki ta despues cu e maestro y alumnonan di Colegio San Antonio a bay den accion diahuebs mainta. “Nos tin expresa si  cu esaki no a cai den bon tera serca e docentenan, pero e la papia si cu directie di scol y representante di SKOA” e maestronan a bisa. “Nos a compronde for di nos director cu tin un solucion temporario riba mesa. Docentenan kier mustra nan buena fe y nos ta en espera di e posibel solucion nan aki”.

Loke a wordo priminti na e maestronan tabata entre otro:

1. Reparacion di tuberia di awa

2. Reparacion na e red di coriente y consecuentemente e posibel solucion pa e airconan

3. Solucion pa seguridad durante ora di scol

E maestronan a indica na e director di scol, representantenan di SKOA y representantenan di SIMAR  cu nan ta contento cu e reaccion di e instancianan pero ta spera cu esakinan no ta keda na promesanan bashi.

Manera NoticiaCla.com a raporta anteriormente caba, e docentenan di Colegio San Antonio a dicidi di tuma un accion di determinacion diahuebs mainta. Motibo pa esaki ta cu nan tabata cansa di e situacion cu nos docente - y alumnonan ta aden.

Manera ya ta conoci e scol ta ubica desde augustus 2013 na Centro di Bario Dakota(CBD) pendiente e renobacion na e edificio na St. Cruz. Na Maart e aña aki nan a haci un accion pacifico pa mustra nan mal contento cu e situacion na CBD. “Despues di e accion aki cierto di nos problema nan a wordo atendi, manera e toiletnan y tambe a traha un afdak pa sombra. Lastimamente esaki no por acapara tur nos 406 alumnonan. A remplasa dies tent pa un afdak, es decir no a crea mas espacio cu sombra. Despues di a traha e afdak a bai cu tur tent. Nos ta contento cu e afdak, pero esey no a soluciona nos problema di falta di sombra” e maestronan a laga sa na NoticiaCla.com. “Ainda nos muchanan no tin un lugar adecuado pa haci e vak di educacion fisico” Segun e maestronan, Colegio San Antonio semper a purba di cana via e canalnan official haciendo diferente peticionnan via carta, email y yamada na e instancianan concerni prome cu dicidi di tuma accion. “Apesar di tur intento lastimamente nos ta sinti cu nos problemanan no ta hañando oido”. E foto di archivo ta di momento cu e welga tabata tumando lugar diahuebs siman pasa.