Rene Herde: AVP no ta coopera cu KB cu ta illegal e inconstitucional

ORANJESTAD – E decision di Premier Eman a bin como sorpresa pa lider di fraccion AVP, Rene Herde, pero e no ta sorprendi. “E no tabata programa, pero e no por a haci otro” Herde a sigui bisa. E ta considera Mike Eman como hende di principio. “Bo no ta cumpra ni bende Mike”. E ta yiu di Henny Eman y Shon A y como tal no tin otro cos cu e por a haci segun Herde. “Nos ta sostene full” e lider di fraccion a sigura NoticiaCla, despues di a tuma nota di e decisión di su lider pa bai den welga di hamber. “Ora bo bin cu algo ilegal, bo por tin tur poder pa hacie. Bo por abusa di dje te hasta. Pero bo no ta haya mi obediencia” Herde a bisa, citando Mahatma Ghandi. Loke tambe Herde a sigura NoticiaCla, ta cu AVP no ta bai coopera cu algo cu ta contra constitucion y statuut. Ora a puntra kico esaki ta nifica y den ki forma lo no coopera, Herde a mustra cu no ta bai coopera cu ningun aspecto di leynan, hasta di Reino, y KB cu ta ilegal. “Nos no por, nos no mag sino nos ta coopera cu cos contra constitucion” Herde a bisa finalmente.