Ainda falta 20% di number di auto cu no a paga 2019 ainda

ORANJESTAD – Un total di 15.834 number di auto na Aruba no ta paga ainda den 2019. Esey ta un total di 20% di tur e numbernan cu departamento di impuesto (DIMP) tin registra na Aruba. Asina e vocero Meverly Romano a bisa diamars den un conferencia di prensa. Segun Romano, “e ta un cantidad hopi grandi”. Diahuebs awor ta e ultimo dia di pago, y despues lo sali cobransa di boet automatico pa esnan cu no a cumpli pa e fecha ey. Esey ta inclui 50% di e suma total. Polis tambe ta haya notificacion cu por cuminsa controla number di auto. 

DEADLINE DI 2 DIA

E grupo cu no a paga ainda, tin 2 dia pa cumpli cu esaki ainda, aunke ta realisticamente imposible pa den e apenas dos dianan cu ta sigui, DIMP fisicamente atende tur e clientenan cu tin cu paga e 15 mil y pico number. Pues ta practicamente sigur cu un grupo di ciudadano lo haya nan sirbi cu un multa dia 1 di maart. E pago ta keda imprimi automaticamente asina cu e anochi bolter. Esnan cu ta paga via banco, como tal mester tene cuenta cu ta dura un of dos dia pa e pago keda ‘cristalisa’. Como tal a bisa cu si paga via banco dia 28 di februari, tin cu haci esaki prome cu 12’or di merdia. 

ESNAN CU NO A PAGA

E grupo di persona cu no a paga nada ainda, pues ta grandi segun calculacion y interpretacion di DIMP. Di e grupo aki, e grupo mas grandi atrobe ta esnan cu tin plachi ‘A’, cu ta  un total di 13597 number. Sigui pa esnan cu ta huur auto, cu ta 958, Taxista cu ta 50, motorciclista 668, y esnan cu ta core truck, 203 number. Esnan cu tin number personalisa ta 516, di cual 99 ainda no a paga nada riba nan number. Nan, mescos cu esnan di DT, mester paga nan number den un solo biaha, esta 620 florin.  

MULTA

E multa cu ta sigui despues di dia prome di maart, ta 50% di e suma cu bo tin habri. Pues si bo tin cu paga p.e. 620  na number di auto y no cumpli, despues di 1 di maart bo ta haya un multa acerca di 310 florin plus 20 florin pa e plachi ta suma na 950 florin, cu ta basta hopi djis pasobra no a paga na tempo.