Canal di television EnergiaVision ta bira Dutch Caribbean Television

KRALENDIJK – E canal di television EnergiaVision ta bira Dutch Caribbean Television (DCTV). Asina e matutino Antiliaans Dagblad (AD) ta raporta diamars. E canal sinembargo ta keda den man di e doñonan actual, entre nan conocido ex politico Ramoncito Booi. E canal tabata den problema financiero, awor ta purbando di lanta cabez riba awa. Desde siman pasa diaranson e canal ta for di aire, pero ta spera di ta den aire atrobe entrante awe of mayan, AD ta raporta. 

BIDA NOBO

Booi awor ta e unico doño, despues cu a traspasa e accionan di su casa riba su nomber via un NV ‘nobo’. E personal di apenas 4 (di 20 ora cu e canal a cuminsa 7 aña pasa) fiho, lo huur trahadonan extra segun necesidad. Booi mes ta encarga cu e maneho diario y ta pagando e debenan bieu cu su propio forza financiero. Asina e kier cuminsa cu un ‘base limpi’ di debe, y asina haci e compania atractivo pa atrae otro interesadonan cu lo kier tuma e operacion over. E canal tabatin un acuerdo algun tempo atras cu e emisora di Aruba Power FM y tabata comparti orario di transmission.