Corte a declara InselAir International bancarota

WILLEMSTAD – Corte a declara InselAir International BV bancarota diamars mainta. E sentencia no tabata un sorpresa ya cu e administrador Rogier vd Heuvel a declara un dia prome caba (lesa e relato di NoticiaCla)  cu esaki lo tabata inevitable. Banda di e bancarota, Corte a mantene decision di e corte di prome instancia pa cu e homologacion (aprobacion) di e acuerdo di creditornan, esta rechasando esaki tambe. 

INTERCARIBBEAN Y TILIGENT

E intento di tuma e compania over door di interCaribbean no a trece trankilidad pa por a completa e acuerdo di creditornan. Ademas e compania mas nobo interesa  Tilgent Capital Trust, cu tabata aparentemente interesa pa tuma InselAir over, a retira nan oferta den fin di siman. Como tal no a keda Corte nada otro di declara e compania bancarota. Esaki kier men cu e compania de facto no tin placa. Tin un lista largo di creditornan cu mester awor wak con nan ta haya nan placa inverti, incluyendo gobierno di Corsou cu a inverti 33 miyon aden, y tambe InselAir Aruba cu tambe mester a haya placa. Lesa e sentencia AKI.