Gobierno purbando di convence Merca pa lanta sanccion afectando Aruba

ORANJESTAD – Gobierno di Aruba ta haciendo intento via Washington na Merca, pa purba na yega di lanta parti di sanccionan cu ta afectando Aruba. Prome Minister Evelyn Wever Croes tabata explicito den forma di manda e mensahe aki. “Nos no ta pidiendo Merca pa lanta tur sanccion contra Venezuela. Nos no tin e pretencion cu nos por pidi algo asina” Wever a sigura durante e conferencia bi semanal di gobierno dialuna. 

LANTA SANCCION

“Nos a pidi pa lanta esun sanccion ey cu ta afecta e refineria na Aruba y lante parcialmente y temporalmente ” Wever a sigui bisa. Esaki ta djis pa Fase 2 su fondonan cu ya caba ta disponibel, y pa nan por yega Aruba pa por caba cu e trabou cu mester keda cla den e proximo simannan. “Nos no a logra ainda. Nos a logra si cu Merca den principio ta di acuerdo. Sinembargo e finalisacion di e negosacion aki no a yega ainda” Wever a bisa. Aruba ta fungiendo como un brug entre e refineria y e autoridad Mericano pa por yega na e informacion y asina logra cu e placa ta wordo ‘released’. Mientrastanto segun Wever, tin empleadonan cu ta haya anuncio di retiro. “Loke nos ta purbando ta pa e placa bin Aruba pa asina fase dos por wordo completa. Gobierno a pone condicion riba mesa, pa si e placa bin, tur esnan cu a wordo retira of anuncia cu a wordo retira, ta wordo tuma bek pa caba e trabou di fase dos.