InselAir mes a anuncia paro di operacion y gradici tur hende

WILLEMSTAD – Mientras cu diamars huez ta dicidi si ta declara e aeroliña InselAir bancarota, awe dialuna e compania mes no a warda te ora cu nan wordo declara bancarota, y a avisa publicamente cu ‘InselAir a para su operacion bou segun codigo di 7I/958 IATA (International Air Transport Organization) cu ta regula tur aeroliña nan codigo. Unabez cu esaki sosode, de facto bo no por opera comercialmente riba tereno internacional. “Na nomber di henter e famia di InselAir, pasado y presente, nos ta gradici cada un di nos paaheronan pa nan lealtad y e tabata un placer pa sirbi boso pa 12 aña” e mensahe ta bisa riba nan pagina di Facebook. Esaki pasobra nan website ya no ta operacional mas. 

KICO PA HACI AWOR

Pa esnan cu tin pasashi riba buelonan 2511/2513 di Corsou pa St Maarten of buelonan 2512/2514 di St Maarten pa Corsou, opera pa Divi Divi y Corendon Airlines, mester comunica cu Divi Divi pa nan status di buelo. Esnan cu ta afecta pa buelonan cancela, mester tin lo siguiente pa tur comunicacion resulta den un contesta corecto. Entre nan, e nomber di tur pasahero envolvi, e number di e reservacion (PNR number cu ta un number di 13 cifra cuminsado cu 958), bo buelo, und abo a cumpra bo pasashi, y con bo a paga pe, cuanto bo a paga y kico e impuesto tabata. Si bo a cumpra un pasashi di un agencia di biahe, bo tin cu tuma contacto cu nan. Si a cumpra un pasashi cash of cu check, por entrega un claim cerca e administrador apunta pa corte, Rogier vd Heuvel na VanEpsKunnemanVanDoorne, na Julianaplein 22. Email E-Mail: creditors.inselair@ekvandoorne.com. No por comunica cu InselAir mas via telefon of email.