Luis Marquez ta sigui autorisa pa papia na nomber di CiTGO pa Aruba

ORANJESTAD – E mando actual di Citgo na Aruba ta Luis Marquez, apunta na juni di 2018 y e ta autorisa (segun prome minister Evelyn Wever na NoticiaCla) segun embahador Venezolano na Merca, Carlos Vecchio pa sigui papia cu ne riba e situacion di refineria. “Nos a haya un ‘si’” Wever a sigura e portal aki. Marquez a keda apunta pa gobierno di Nicolas Maduro, mientras cu e embahador ta apunta temporalmente pa e presidente interino Juan Guaidó.

DECLARACION DI ALVIN KOOLMAN

Mientrastanto Wever a purba reacciona riba e declaracion recien di e director di Refineria di Aruba, compania doño di e refineria cu CITGO ta operando como upgrader den proceso, esta Alvin Koolman. Koolman a declara recientemente cu ta mas beneficioso pa e refineria si Juan Guaidó ta na mando, pasobra e ora no tin sanccion contra e refineria cu ta stroba e trabounan. NoticiaCla a puntra Wever si e declaracionan ey no ta compromete Aruba y gobierno, contra Maduro. De hecho, e portal aki a puntra Koolman e dia ey, kico ta pasa si en caso Maduro mes keda na poder, y cu si e declaracionan haci por tin represaya pa Aruba. Wever no a tuma nota di e declaracion aki completo, pues no por a reacciona ariba. Loke si el a reacciona ta e parti di neutralidad. 

GOBIERNO NEUTRAL

Segun Wever, gobierno di Aruba ta para pa neutralidad. “E ta un posicion cu no tur hende ta compronde. Tin hende ta bisa con bo por ta neutral den un situacion asina dificil?” Wever ta bisa. Pero segun e prome mandatario, ta hacie pa Aruba, aunke tur hende por tin su opinion personal den e situacion aki. “Pa Aruba ta cumbini pa tin un posicion mas neutral posibel. Aruba mester a deal cu Venezuela prome, awo y despues. Ora cu a puntra e mandatario con bin como prome mandatario encarga alavez cu e cartera di energia y cu e gobierno ta doño di RdA, e no por sa e declaracion ey, el a splica cu tin un diferencia ora cu bo tin un compania estatal y ora cu bo tin un departamento di gobierno. Cada uno tin su responsabilidad y su autoridad. “E declaracion cu a wordo haci, no ta wordo consulta di adelanta cumi den e caso aki” Wever a sigura e portal aki.