Poco Arubiano a bolbe Aruba for di Venezuela via e ‘excepcion’ duna

ORANJESTAD – Diadomingo tabatin solamente 3 persona di Aruba riba un avion disponibel for di Venezuela pa Aruba, cu a haci uso di e excepcion duna pa gobierno di Venezuela, pa laga Arubianonan na Venezuela bay Aruba bek, despues cu a cera frontera siman pasa. Ta trata di e buelo di Conviasa, riba cual tabatin tambe 81 persona Venezolano cu a bay bek cu e buelo. 

CUANTO BUELO

E mandatario no por a bisa cuanto buelo lo tin ainda ni cuanto dia e excepcion duna door di Venezuela diabierna, lo dura. E prome buelo tabata diadomingo y awe esaki a sigui. “Porta nos tin mayan” Wever a bisa sceptico, pasobra e informacion ey no tabata conoci p’e. De hecho, esey tabata e pregunta di NoticiaCla si tabatin un fecha specifico. 

SALI AWO

 “Si tin hende pega, ta awor nan ta pega. Y pesey a pidi tur hende cu awor bo ta haya oportunidad pa bo bay bek” Wever a bisa. E ta referi na e comunicado di weekend cu ta pidi tur ciudadano pega na Venezuela pa tuma contacto cu e aeroliña cu nan a biaha cune. Pesey segun Wever ta hopi importante pa tur hende actua awor. 

PROBLEMA LOGISTICO

No ta tur aeroliña tabata cla pa trece nos hendenan bek segun Wever. Mester compronde cu tin aeroliña cu tin cu bay Venezuela bashi, anto trece algun hende bek. “Nan no ta bay  haci esey pa motibo di gasto, pues e ora tin cu wak si por combina pasahero di diferente buelo y pone nan hunto”. Ta hopi importante segun Wever, pa e pasaheronan meld na nan agencia di biaha, pa wak con DCA ta haci e coordinacion pa e hendenan por bin bek. Di parti di DCA, e portal aki ainda no a haya un reaccion di cuanto hende a registra pa bolbe Aruba bek. Potret cortesia di El Estimulo, di e avion di Conviasa na Aruba.