Wever: No ta bay trata e mocion awor pa retira miembro di CAFT

ORANJESTAD – Pa aworaki gobierno no ta bay trata e asunto di posibel retiro di miembro di e colegio di supervision CAFT, esta Henk Kamp. Asina Prome Minister di Aruba Evelyn Wever Croes a contesta NoticiaCla dialuna. Siman pasa Parlamento a pasa un mocion urgiendo gobierno di Aruba pa acerca CAFt pa e colegio na su turno encamina e proceso di retiro di Kamp, pasobra segun ley di LAft e ta ilegal nombra. Pa awor, gobierno ta wardando e ‘nader rapport’ riba e rapport di Raad van Advies riba e ley nobo, pa despues wak con esaki a keda. Despues cu esey ta bay hib’e Parlamento y eyden ta bay atende cu e asunto. Esey por bira otro luna posiblemente. Pa awor pues, no ta bay haci nada cu e mocion. E ley sinembargo mester a keda pasa prome cu 31 di December 2018.

LEY DI LAFT Y AVP

Segun Wever, tabata na 2015 ora cu Parlamento di e tempo ey pasa e ley di LAft , fraccion di AVP na ultimo momento a entrega un amienda riba e ley, pa haci imposibel pa ex politiconan por drenta den CAft. “Den e tempo ey, nos tabata den oposicion nos  abisa cu nos no ta di acuerdo cu esey. Nan a duna como splicacion cu hendenan manera Nilo Swaen nunca por drenta den un CFT si ta pa nan” Wever a cuminsa na bisa. “Nos a bisa, cu sin bay riba persona, pero por tin ex politico cu por tin e capacidad y e conocemento y experiencia cu por atende cu supervision financiero”. 

CAMBIANDO LEY

E mandatario a sigui bisa cu actualmente ta cambiando e ley di LAft, y ta preparando e ‘nader raport’ cu ta e reaccion riba e conseho di Raad van Advies y ta contemplando e diferente cambionan. Wever a mustra tambe cu e ta di acuerdo cu e ponencia di colega di partido y parlamentario Endy Croes su reclamo cu mientras cu CAFt ta exigi y critica gobierno tene su mes na tur e articulonan di ley di LAft, nan mes no ta haci esaki, esta nan ta trahando empugna cu ley. Y aki ta e referi na Henk Kamp. “Mi ta respeta e discussion ey y mi ta di acuerdo cu e discussion ey tambe” Wever a bisa, refiriendo na e discussion cu Endy Croes a y ta hibando riba e tema. 

CONFORMIDAD DI LEY

A mustra tambe cu ta hopi importante cu cualkier cu bira e decision, haci esaki den tur conformidad cu ley. “Na e momentonan aki nos ta trahando riba e nader rapport, despues nos ta bay Parlamento cu esey, y den e cuadro ey nos lo bay atende cu Parlamento di dje” Aworaki nos no ta bay haci nada.” Wever a bisa.