Welga na waf pa motibo di problema cu negoshacion di CAO

ORANJESTAD – Trahadonan di e compania di stiwado ASTEC na Playa a bay den accion diamars mainta, pa protesta riba e hecho cu nan ta tranca cu e negoshacion di CAO. E problema ta e condicion di e CAO, y e duracion di esaki. E trahadonan kier un aumento di 20% di salario den 3 aña di tempo, mientras cu gerencia di e compania ta boga pa un aumento di salario basa riba e.o. performance premie. Trahadonan mientrastanto a exigi pa mira cifras di e compania pa wak si enberdad e situacion ta manera cu ASTEC ta bisa.

E CAO actual ta vence na december, y e trahadonan lo kier keda cla pa mitar di november, pa evita cu nan tin cu bay negosha den e periodo ocupa nan dilanti. E compania ta descarga y carga 300 pa 400 barco pa aña na waf. Un otro discusion ta e aumento di costo di bida. Segun e trahadonan, esaki a aumenta cu 25% den 3 aña, mientras cu ASTEC ta haya cu esaki ta 2.5% segun estudionan haci. E salario segun ASTEC, ta di nivel halto caba, y ademas e plannan pa mudamento, lo trece inversionan extra pa e compania, cu ta pone un peso financiero cu nan mester maneha mas estricto y responsabel.