Pompeo: Dianan di regimen di Nicolas Maduro ta conta

WASHINGTON/CARACAS – E dianan di e regimen Maduro ta conta, segun minister di relacionan exterior di Merca, Mike Pompeo a bisa diadomingo. E ta considera e dia di diasabra como uno tragico, refiriendo na e hecho cu tabatin hopi violencia ora cu a purba trece ayudo humanitario di Colombia pa Venezuela. “E dianan di Nicolas Maduro ta conta!” Pompeo a bisa durante un entrevista televisa na Fox News. Mes momento el a corda cu tur opcion ta riba mesa pa restaura democracia na Venezuela, y a garantisa cu lo tuma medida ‘tras di e dia tragico di ayera’. 

USO DI FORZA

Mientrastanto e embahador di Venezuela na Bogota, Julio Borges a bisa e grupo di Lima (grupo di paisnan Latino Americano) cu dialuna na Bogota lo solicita hunto cu e presidente interino Juan Guaidó pa tuma medida extra y usa forza pa por trece e productonan humanitario di Colombia pa Venezuela. Kier escala medida diplomatico, politico y e uso di fuerza contra e regimen, pasobra a blokea e ayudo humanitario pa yega su destino.