Diasabra a habri cu tension na frontera entre Colombia y Venezuela

CUCUTA – Frontera di Venezuela cu Colombia a amanece cera manera anuncia previamente, pa orden di gobierno di Nicolas Maduro. Esaki kier men cu ainda e ayudo humanitario destina pa esnan na Venezuela no a logra drenta. Medionan di prensa ta raportando varios caso di violencia, y depende cua medio raporta, e noticianan ta diferente. Tabata diabierna anochi manera cu NoticiaCla a raporta caba, Venezuela a anuncia cierre di e frontera di Colombia tambe debi na amenaza serio cu nan a haya. E ciere ta inclui un ciere total temporal di e brug di Simon Bolivar, Santander y Union.

Brazil su frontera cu Venezuela tambe a keda cera for di diahuebs anochi. Y e frontera cu islanan ABC ta cera for di diaranson. Cierto medionan ta raporta violencia y hasta morto na cierto parti di e fronteranan. E prome tabata na frontera cu Brazil. Diasabra (awe) tabata e dia cu e presidente di parlamento Venezolano y auto apunta Juan Guaidó a pone pa transporta e ayudo humanitario pa Venezuela for di varios punto di entrada. Gobierno Maduro sinembargo a sigura cu no tin ningun crisis humanitario y cu nan lo no laga esaki drenta. Di otro banda nan mes lo provee ayudo for di Rusia.