Cu castigo di Croes, huez a manda señal cu corupcion ta algo serio

ORANJESTAD – Conforme e sentencia di huez, ex minister Paul Croes mester pasa 4 aña den prison como castigo pa corupcion. Ademas, a prohibi e ex mandatario di eherce un funcion gubernamental pa por lo menos 9 aña, e sentencia maximo cu ley ta permiti pa un cargo asina. E sentencia contra Croes, ta splica detayadamente kico tur Croes a haci, ta acusa di dje, y cu finalmente a causa su caida politico. Croes mes a keda sorprendi y cu ‘absolutamente (no) a spera e sentencia aki’. Mesora a confirma cu a duna su ekipo legal orden pa apela e sentencia di biaha. 

E SENTENCIA

E sentencia ta uno hopi detaya cu 70 pagina ta describe e actuacion di Croes y su co-sospechosonan, y tambe criteria di huez pa cu su decision tuma. Croes tabata sospecha di 6 cargo, di cual primariamente 5 a keda legalmente proba. Nan ta Complice di soborno, abuso di poder como minister, complice di malversacion, labamento di placa y emplea un persona ilegalmente. Secundario, Croes a keda condena di ta participa den un organisacion criminal. Algo cu awe atrobe el a desmenti categoricamente. “Mi no ta wak mi mes den un organisacion criminal” Croes a bisa. Segun Huez, pa tur e 6 puntonan, a keda legalmente y convincentemente proba cu Croes a comete e actonan aki. Y tur e cargonan proba ta castigabel pa ley, y como tal Croes ta bira asina castigabel pa ley. E sentencia, considera relativamente halto (fiscal a pidi 5 aña), pa huez ta pa asina ‘manda un señal den comunidad cu corupcion ta algo serio y sigur ora cu bo hacie den funcion di un gobernante’. 

DETENI DESPUES DI SENTENCIA

E loke cu huez a ‘spaar’ Croes di dje, ta cu e lo mester a keda geboeid y transporta di biaha pa KIA pa cuminsa sinta su castigo. E demanda di fiscal tabata netamente esey. Pero huez, manteniendo e pensamento di un huez comisario riba e punto ey, a rechasa e ponencia ey y a rechasa asina e peticion pa suspende e orden di suspension di su detencion preventivo. Cu esaki, Croes por a bay cas y warda e proceso di su apelacion den libertad. Croes mes a mustra cu e tabata prepara pa eventualmente bay KIA awe mes, pero awor ta bay den tur trankilidad familiar y prepara pasobra ‘nos ta duro’. 

Lesa e sentencia AKI.