Grupo di 7 cu ultimatum pa gobierno riba re-apertura di refineria valero

ORANJESTAD – Grupo di 7 a duna gobierno di Aruba 48 ora pa contesta nan manifiesto entrega diamars atardi riba e re-apertura di e refineria Valero. No ta conoci kico lo sosode si e grupo no haya su contesta dentro di e tempo stipula. E grupo ta indica cu nan tin por lo menos 3 grupo of inversionista interesa cu ta dispuesto pa cumpra e refineria. Como tal nan kier sa si gobierno ta interesa pa sigui negocia si of no. E manifiesto mes a wordo ricibi pa secretaria di conseho di minister, Nicole Hoevertz, enves di un mandatario di e gabinete.

E grupo di 7 (un di e gruponan di hende malcontento riba gobierno) e biaha aki a bin na nomber di e ex trahadonan di e refineria, y ta bringando e asunto pues na nan nomber. Den e manifiesto entrega, nan tin 7 punto cu nan a pone dilanti riba cual nan lo kier mira un contesta.

Entre e preguntanan, ta figura 1, si gobierno ta interesa den e reapertura di e refineria, si of no. Si den caso cu e contesta ta no, nan kier sa e motibonan. Si e contesta ta si, nan kier sa e fecha y ora dentro di dos siman di tempo pa e gruponan interesa por reuni cu gobierno. Interesante punto ta cu e gruponan cu lo ta interesa, lo ta interesa pa cumpra tur cos, incluyendo e operacion di trans shipment.

Entre e exigencianan di e grupo, tin cu gobierno mester duna contesta por escrito cu lo coopera pa realisa e compra di e refineria aki, y lo facilita e compania(nan) interesa cu tur e condicionan fiscal cu a duna Valero. Y finalmente, e grupo kier un contesta di tur e preguntanan aki, dentro di 48 ora. E manifiesto ta firma pa srs Dirks y Williams.