Romero: Avioneta accidenta lo keda den e mondi di Calabas pa awor

ORANJESTAD – Hopi cos nobo no a sali for di e conferencia di prensa di minister Chris Romero diahuebs merdia, tanto riba e caso di avioneta cu a cay, y e situacion di frontera cera. E unico cos cu a keda confirma ,segun e mandatario, ta cu e avion tabatin Aruba como destinacion final, despues di a lanta buelo for di Higuero (Rep. Dominicano) y cu e avion por lo pronto lo keda na e sitio pendiente pa wak kico lo haci cu ne. Pa cu e situacion di Venezuela, ta purbando pa sa cuanto Rubiano tin pega eynan, y cuanto Venezolano tin pega na Aruba cu mester bolbe. Y pa ambos, mester tin un pasashi caba di buelta. Fuera di esey, no tin nada nobo a sali. 

E AVION

Casi nada nobo no a bin afo di e conferencia cu no a wordo bisa den e comunicado emiti un dia anterior. E mandatario a practicamente ripiti varios pida informacion duna caba, y ora cu prensa a purba clarifica e informacion, a keda na speculacion y ‘tin cu warda investigacion termina’. De hecho cu prensa tabatin cierto informacion caba cu minister no kier of por a confirma, manera e identidad di e personanan abordo y nan situacion actual. Den e matutino Bon Dia Aruba, a publica nombernan di e dos personanan abordo, y ta referi segun e matutino, na Luvin Carero (Venezolano) y Alexis Sanches (Dominicano cu nacionalidad Mericano) E avion lo keda na e sitio den e mondi unda cu a haye, cu vigilancia te ora dicidi kico ta haci cu ne. Ora di kit’e no kier destrui e naturalesa rond di dje, pues esey ta e reto mas grandi. 

VENEZUELA

Pa loke ta Venezuela, aki tambe nada nobo no a bin dilanti, cu solamente ta trahando di localisa e Arubianonan cu ta pega na Venezuela, y kier sa cuanto nan ta exactamente. Un dia prome, premier Wever a bisa exactamente mescos pues nada nobo eynan. Solamente a bisa awe cu e intencion ta pa check con pa haya nan bek, y esnan pega na Aruba (mas tanto Venezolano) pa nan bolbe nan pais. Pero e exigencia ta cu nan (tanto Arubianonan na Venezuela como Venezolanonan na Aruba) mester tin un pasashi caba, cu nan lo mester a bay bek cu ne. Pues no por usa e momento aki pa transporta pasaheronan cu no tabata planea di bolbe, como un pasahero nobo. Potret cortesia Brandweer Aruba.