Prome carga di producto pa yudansa na Venezuela ta yega Corsou awe merdia

WILLEMSTAD  – E prome carga di productonan pa duna yudansa na pueblo di Venezuela, ta yega Corsou diahuebs merdia. Asina oficina di Prome Minister di Corsou Eugene Rhuggenaath a confirma diahuebs merdia. Ora cu e productonan yega Corsou, nan lo keda deposita te ora cu bira posibel pa sigui transporta nan pa Venezuela. Ta trata di productonan colecta durante un fundraising di comunidad Venezolano na Miami, Florida. E comunidad a cera un contracto cu dos compania local, cu ta bay regla e transporte local y lugar pa warda e productonan. E productonan lo yega den un avion commercial.  

E productonan, mescos cu tur producto pa duna ayudo y cu ta bay yega Corsou den e simannan benidero, ta keda den depositonan na Corsou. Gobierno di Corsou ta sigui informa cu ningun carga di e productonan pa duna yudansa, no ta bay Venezuela na un manera forza. E yudansa for di Corsou ta bay sosode ora cu esaki ta acorda door di gobiernonan di Venezuela. Tanten, tur cargo ta keda den deposito commercial na Corsou. E comunicado no ta specifica si, kico e kier men cu ‘gobiernonan’ di Venezuela. NOTA: E potret cu ta acompaña e articulo ta di voluntarionan na e frontera na Cucuta Colombia, preparando otro ayudo humanitario cu a yega caba y ta cortesia di e canal WPLG, di Miami.