Usuarionan di Whatsapp pronto por rechasa inclusion automatico den groupchat

NEW YORK – Usuarionan di e aplicacion Whatsapp no tin cu frustra mas cu e aspecto di chat den grupo, esta group chat, sin cu nan kier. Whatsapp a desaroya e posibilidad pa un usuario cu no kier participa den un group chat, por rechasa esaki. Actualmente, un usuario por wordo hinca den un groupchat sin cu e kier. E por sali di e chatgroup solamente despues di a wordo añadi caba. Ademas, tur hende den e grupo por mira cu e persona a ‘sali’. Esey awor ta bira pa pasado.

CAMBIO

Pa hopi cu no ta gusta group chat, esaki ta un alivio hopi desea. E aplicacion ainda no ta official y pues no disponibel pa tur hende. E cambio ta ensera cu ora cu un persona kier hincabo den un group chat, e mester invitabo, y abo por sea acepta of rechasa. Un di e beneficionan ta cu den e forma aki, bo nomber y number no ta bira conoci pa e resto di grupo, te ora cu abo dicidi otro. Bo tin 72 ora pa dicidi si bo ta acepta e invitacion of no. 

INSTRUCCION

Bo por bay den WhatsApp > Privacy > Groups settings y selecciona e occasion cu bo kier ta parti di dje, esta: "everyone", "my contacts" of "nobody". Si bo no contesta den 72 ora, bo no por ta parti mas di e grupo, ni si bo kier. No ta conoci ki dia e posibilidad aki ta bira uno pa tur hende.