Dolfi Richardson: SAC ta para riba nan punto y lo bay Corte si mester

ORANJESTAD – E reunion entre SAC (Stichting Arubaanse Carnaval) y mando policial dialuna no a clarifica mucho cos entre e dos partidonan. Por lo menos no segun e protagonistanan. Den un comentario pa NoticiaCla.com, Alto Comisario di polis Dolfi Richardson a bisa cu e reunion ‘a bay bon’, pero cu ‘nan (SAC) ta para riba nan punto’. Y di parti di SAC, e presidente Tecla Kelly a bisa NoticiaCla.com cu ‘polis tin e permisonan firma pero cu nan ta wanta ainda’.

E reunion di dialuna mester a trece claridad y duna partidonan un chens pa sali afo y keda cla cu e asunto di permiso. Segun Richardson, SAC tabata hopi cla cu si nan no haya e permisonan ‘nan lo hiba gobierno Corte, si ta necesario’. Den caso di SAC, Kelly a mustra cu e no ta compronde pakico tin tanto dificultad pa otorga e permisonan si ya caba e fundacion ‘ Gruponan Uni’ mes a bisa gobierno, pa duna SAC tur e permisonan ya cu nan no ta interesa mas. “Ta polis tin e permisonan wanta. Nos no ta compronde. Nos mester a djis pasa busca nan. Polis a bisa nan ta firma y cla pero gobierno tin e wanta”.

Segun Richardson, no ta na dje pa dicidi ken y ki ora e permiso ta wordo otorga pa organisa e carnaval. “Esey ta un decision cu gobierno tin cu tuma” Richardson a sigura NoticiaCla.com diamars mainta. Gobierno di su banda, segun premier Eman dialuna, tabata wardando pa haya claridad despues di e reunion di dialuna. Algo cu no a tuma lugar ainda. Richardson awor lo raporta bek na gobierno y e ora e decision lo por wordo tuma.

 SAC di su banda, a mustra cu nan ta continua cu nan preparacion di carnaval 61, y no ta laga nada stroba nan. Nan ta conta cu nan ta ricibi e permiso, pasobra SAC ta para ariba cu ta un permiso di carnaval so tin, contrario na e pensamento di gobierno y polis, cu tin varios tipo di permiso cu por wordo duna. Minister di Cultura, Otmar Oduber a bisa NoticiaCla.com cu e no ta mete mas y a pone un punto tras di su ‘intermediacion’. Si esaki ta keda vigente, no ta conoci ainda.

 Mientrastanto NoticiaCla.com a compronde cu cierto gruponan cu ta forma parti di Grupo Uni, ta evaluando pa enves di participa na carnaval 61 na Aruba, pa participa na carnaval 45 di Corsou. Nan ta evaluando pa participa den e marcha di despedida, cu ta esun final. E ta e ekivalente di e parada di ‘kimamento di momo’, pero tur na luz. Manera ta conoci ultimo añanan e parada aki a bira esun mas popular, ya cu (contrario na Aruba) practicamente tur e gruponan cu a participa den e ‘gran marcha’ di diadomingo, ta participa na esun di diamars anochi, cu ta e marcha final. E foto ta di archivo di cuerpo policial di alto comisario Dolfi Richardson durante un di e paradanan di carnaval 60.