Si ta pa OM, Parlamentario Heyliger ta keda deteni por lo pronto

PHILIPSBURG – Theo Heyliger, lider di partido di gobierno  United Democrats Party cu a keda deteni diamars pa corupcion, ta keda presenta dilanti huez comisario diahuebs. Ministerio Publico ta sali di e punto di salida cu e lo keda deteni por lo pronto. Heyliger ta wordo sospecha di soborno y labamento di placa den caso Larimar. Esey ta e caso unda cu ora cu Heyliger tabata minister, cu e lo a otorga permiso di construccion. Den e caso aki hopi persona di gobierno ta envolvi segun OM.  

Aña pasa FIOD na Rotterdam a detene un consultant Hulandes cu Heyliger y otronan lo a soborna pa duna contractonan di gobierno na  Volker Construction/Stevin en Devcon. E homber ta deteni ainda na St Maarten. E ta sospecha tambe den un otro caso unda cu e lo a ricibi placa di companianan di construccion. Husticia ta sospeche tambe di labamento di placa di por lo menos 9 miyon florin.

E detencion di Heyliger tabata premira pa lunanan largo caba. E reaccion na St Maarten ta varia y tin sosten tambe.  Riba camera algun persona kier a papia, pero mayoria di esnan entrevista ta sostene Heyliger fervientemente. “E Hulandesnan mester atende cu nan propio caso di corupcion y laga nos Theo na pas” un señora ta declara. 

 Cu detencion di Heyliger, tin un bom bou di e gabinete actual di St Maarten, cu ta gobernando e isla cu un mayoria minimo. E sostenibilidad ta birando mas y mas chikito, y den un declaracion di e partido United Democrats Party, nan a indica cu nan ta bay delibera riba e rumbo di e partido.  

Fuente: Caribisch Netwerk Autor: Tim van Dijk