Gobierno di Corsou: No drenta panico pa ceramento di frontera cu Venezuela

WILLEMSTAD – Segun gobierno di Corsou, no mester drenta panico pa ceramento di frontera cu Venezuela. Asina e ta raporta pa medio di un comunicado diahuebs mainta. Gobierno di Corsou a tuma nota di e decision unilateral di Gobierno Venezolano pa sera fronteranan pa Aruba, Corsou i Boneiro dia 20 di februari 2019. Venezuela a cera e fronteranan pa motibo di e ayudo humanitario cu organisacionnan di ayudo internacional a bin ta plania atraves di Corsou, cu a pone su mes disponibel pa fungi como centro logistico pa almacenimento i transito di productonan di ousilio. Comunicacion oficial tocante ceramento di fronteranan mes no a tuma luga di parti di Venezuela cu gobiernunan di Corsou, Aruba, ni di Hulanda pa Boneiro.

LAMENTO

Gobierno di Corsou ta lamenta profundamente e desicion cu Gobierno Venezolano a tuma, ya cu na tur momentu Gobierno di Corsou a duna di conoce pa medio di tur canalnan di comunicacion oficial, cu e ayudo humanitario ta unicamente dirihi riba yuda alivia e situacion precario di e pueblo Venezolano. Na niun momento lo forsa e ayudo aki si Venezuela no ta desea esaki. Tambe a comunica extensivamente cu ta trata aki di puramente un operacion civil i no militar. Pa e motibo aki tambe Corsou – tumando un bes mas den consideracion e laso economico i cultural estrecho cu e tin cu e pais bisiña – lo sigui ofrece e facilidad di por ta un hub humanitario te na momento cu por cuminsa distribuí e ayudo aki na Venezuela.