Flanegin: Bureau Integridad Aruba: significado, mision y tareanan

ORANJESTAD - Manera ta conoci, pa medio di un decreto gubernamental a institui e Bureau Integridad Aruba (BIA) dia 1 di oktober 2018. BIA ta un departamento nobo di gobierno cu ta parti di Ministerio General, Integridad, Cuido Gubernamental, Innovacion y Energia. Segun sra Amalin Flanegin, encarga cu e proyecto aki, e mision di BIA ta salvaguardia y promove integridad den  gobierno, su institutonan y empresanan y di e empleadonan publico y demas trahadonan den gobierno, den e institutonan y e empresanan di gobierno. E ciudadonan di un pais ta depende di servicio publico y tin derecho riba organisacionnan, “bestuurders” y empleadonan publico cu ta integro den ken nan tin confianza. 

A traves di diferente instrumento BIA, lo traha pa realisa su obhetivonan principal. BIA su tareanan y metanan aworaki ta regla den e mesun decreto cu a instituye pero e intencion ta cu lo regla BIA den un ley formal. Actualmente ta preparando pa operacionalisa BIA mas lihe posibel entre otro pa adkeri e personal necesario, e hefe di BIA, e ubicacion y ta traha riba formulacion di maneho y  diferente proceduranan.

Tareanan principal di BIA

E tareanan principal di BIA lo cubri e tres siguiente areanan: 1) prevencion pa medio di conscientisacion encuanto significacion di integridad, 2) traha maneho y duna conseho riba e manera con pa preveni y conscientisa encuanto integridad y 3) ta un punto pa entrega notificacion di posibel violacion di integridad, “screen” e informacion ricibi y despues pasa e informacion pa otro instancia (judicial)/autoridad pa nan haci un investigacion mas profundo di e notificacion. 

BIA ta bay contribui, eherciendo e tareanan menciona, na implementacion di e Tratado di Nacionan Uni contra Corupcion, New York, 31 di oktober di 2003 (Tratado contra Corupcion). 

Ta premira cu BIA lo por ta completamente activo riba e areanan menciona despues di a implementa e diferente pasonan necesario gradualmente. 

Enfoke riba conscientisacion

BIA lo traha riba maneho (beleid) den cual primeramente lo enfoca riba conscientisacion pa por evita corupcion den nos aparato gubernamental. Esaki ta coincidi cu recomendacionnan di, por ehempel, e Tratado di Nacionan Uni contra Corupcion y diferente otro publicacionnan riba e tereno di combatimento di corupcion. Prevencion di corupcion ta primordial y por logra esaki entre otro door di conscientisa pa medio di organisa por ehempel training continuamente riba e topico di balornan fundamental (kernwaarde), pero tambe door di duna informacion na hefenan di departamentonan di gobierno con pa ehecuta un analisis di riesgo/vulnerabilidad den nan propio departamento y asina trata di evita cu un riesgo cu e hefe constata den su evaluacion, por materialisa door di tuma medidanan necesario. E trayectonan di conscientisacion mester ta duradero y continuo pa integridad por ta un balor fundamental den gobierno. Lo duna atencion di diferente manera uzando medionan social, medionan di prensa y tambe sesionnan di informacion/training den cual ta pone atencion riba dilemanan cu por confronta den trabow.

Otro tareanan di BIA

Ademas di traha riba desaroyo di programanan preventivo di concscientisacion, BIA lo ta encarga cu desaroyo di maneho riba tereno di integridad y cu traduccion di e maneho aki den formanan di implementacion practico pa preveni violacion di integridad o corupcion. 

Ta importante pa menciona cu BIA lo fungi como un oficina unda empleado publico y ciudadonanan por notifica (meld) un posible violacion di integridad. BIA lo ta un punto di notificacion (meldpunt) cu lo examina e informe cuidadosamente y manteniendo loke el a ricibi confidencial, pa despues si tin base suficiente pa sospecha cu ta trata di un violacion di integridad, BIA ta manda e informacion pa por ehempel Ministerio Publico of Departamento di Recurso Humano pa nan sigui cu e investigacion. No ta tur tipo di violacion di integridad por notifica na BIA y no ta tur BIA lo trata. Mester ta notificacion, por ehempel, di un empleado publico. Situacion manera un empleado publico ta mira un otro colega pafo di ora di trabow ta subi den su auto como chauffeur bow influencia di alcohol y core bai.  Of un ciudadano ta mira un empleado publico ta horta den un tienda. Ta e colega so a mir’e ta horta. Por haci un notificacion asina na BIA. E situacionan aki ta ehempel di casonan cu por notifica na BIA cu despues di screening lo pasa e informacion na otro instancianan cu cual e ta traha riba e tereno aki.

BIA lo traha den cooperacion estrecho cu otro autoridadnan riba e tarea aki. E intencion no ta pa djis manda tur informacion sin evaluacion pa otro instancianan. 

Por ultimo BIA lo ta responsabel pa analisa e notificacionan ricibi y traha estadistica di esakinan pa por determina unda e riesgonan di violacion di integridad den e gobierno pa por conseha cua medidanan por tuma y tambe mehora o actualisa maneho existente. Lo cuminsa cu e aparato gubernamental prome. A base di e resultadonan di e analisis di e notificacionnan BIA lo traha riba maneho nobo y desaroya medidanan pa evita violacion nobo di integridad. 

BIA su so no por crea un comunidad y specificamente un aparato gubernamental integro. Ta tur sector di comunidad mester hunga nan rol y tuma nan responsabilidad na serio pa preveni y combati corupcion den aparato gubernamental.