Rodriguez: Venezuela a cera frontera pasobra Corsou a bira ‘supuesto hub humanitario

CARACAS – E motibo cu Venezuela a cera frontera cu islanan ABC, ta e hecho cu ‘Gobierno di Corsou a presta su mes pa ta un hub pa un supuesto ayudo humanitario forza pa cu Venezuela’. Asina e vice presidente ehecutivo di Venezuela Delcy Rodriguez a bisa den un declaracion televise diaranson merdia. Esaki tabata e prome declaracion official gubernamental desde cu e prome señal di cierre di frontera a bira conoci diamars merdia. Segun Rodriguez, ta basa riba esey, cu a dicidi di tuma decision di suspende tur tipo di buelo priva commercial y trafico di boto entre Venezuela y islanan Aruba, Corsou y Bonaire. 

DECISION SOBERANO

Segun e vice presidente, e ta un decision ‘ soberana di e gobierno constitutional y legitimo di republica Bolivariana di Venezuela’, ante loke ta pretende forza y desconoce e autoridad legitimo di e pais. “E hecho cu Corsou, un isla cu cual nos a tene relacionan historico di Amistad, bisiña y cooperacion, hermandad a dicidi di presta su mes pa e show aki, cu e unico cu e ta procura, ta e intervencion di Venezuela”. Esaki segun Rodriguez, a keda instrui pa e presidente Nicolas Maduro na e canciyer Jorge Araeza. Segun Rodriguez, ta un intento di Corsou pa no conoce e leynan di Venezuela.  A mustra cu si di berdad kier a yuda Venezuela, por a kita e embargonan, revoca e boycott financiero pa asina Venezuela tin acceso na su fondonan internacional. “Ta cu e fondonan aki nos por percura pa remedy, y mercancia” Rodriguez a sigura. 

PAKICO CASTIGA CORSOU Y NO HULANDA

NoticiaCla a compronde cu e hecho cu ta 'castiga' Corsou ( y hunta cu ne Aruba y Bonaire) y no Hulanda, ta pasobra no ta wak e islanan como un colonia Hulandes, sino mas bien ta considera nan como islanan autonomo, pa medio di e status aparte cu tanto Aruba y Corsou tin. 

CONFIRMACION AEREO

Mientrastanto mescos cu aña pasa januari, a keda emiti e asina yama NOTAM (NoTice to AirMen) cu ta oficialisa e ciere di frontera aereo den e caso aki. E ta splica cu basa riba e articulonan 56 y 57 di e ley di aeronautica civil di Venezuela, ta prohibi trafico aereo priva y commercial entre Venezuela y islanan ABC. Wak e video di e declaracion AKI.